Ekologiya və Təbii Sərvətlər Nazirliyi beynəlxalq tərəfdaşlarla birgə “Azərbaycanda az tullantılı və tullantısız elektrik nəqliyyatına keçid” mövzusunda seminar təşkil edib. Tədbirdə elektrik avtomobillərinə sürətli keçidin təmin olunması, bu sahədə görülən işlərin ətraf mühitə və nəqliyyat sektoruna təsiri, prosesi ləngidən amillər geniş müzakirə olunub.

Seminarda çıxış edən Baş Dövlət Yol Polisi İdarəsinin əməkdaşları tərəfindən yol hərəkəti təhlükəsizliyi ilə bağlı hazırda ölkəmizdə icra olunan Dövlət Proqramının məqsədlərinə xidmət edən sözügedən tədbirin aktiv, passiv, ekoloji və qəzasonrası təhlükəsizliyi yüksək olan, habelə ekoloji cəhətdən təmiz, elektrik mühərrikli nəqliyyat vasitələrindən istifadənin təşviqinə töhfə verdiyi, həmçinin "Yaşıl nəqliyyat"a keçidin stimullaşdırılmasının köhnəlmiş, texniki-təhlükəsizlik baxımından və ekoloji cəhətdən yararsız nəqliyyat vasitələrinin çıxdaş edilməsi prosesini sürətləndirdiyi bildirilib. ​

Bununla yanaşı, elektrik və hibrid mühərrikli avtomobillərə sürətli keçidin reallaşması üçün əvvəlcədən uyğun zəmin yaradılması,bu sahədə kompleks və daha mütəhərrik metodların hazırlanması, hədəf qrupları arasında maarifləndirmə, təbliğat-təşviqat işinin daha geniş kontekstdə və miqyasda aparılmasının vacibliyi xüsusi vurğulanıb.