Bakı, 31 iyul — Azadmedia.az

Quba şəhərində “Soyqırımı Memorial Kompleksi”nin və “Çıraqqala-Şabran” Dövlət Tarix-Mədəniyyət Qoruğunun birgə əməkdaşlığı çərçivəsində 01.08.2024-cü il tarixindən etibarən Kompleksdə “Qədim Şabranın yaşayış mədəniyyəti” adlı sərgi təşkil ediləcək. Sərgidə “Çıraqqala-Şabran” Dövlət Tarix-Mədəniyyət Qoruğuna aid, Şabran çay ətrafında yerləşən qədim Şabran şəhərinin qalıqları arasından aşkar edilmiş onlarla maddi-mədəniyyət nümunələri, dəmir və dulusçuluq məhsulları və s. nümayiş olunacaq. Gələn ziyarətçilərə maddi-mədəniyyət nümunələri ilə bərabər "Çıraqqala-Şabran" qoruğuna daxil olan abidələr və onların tarixləri barədə də video görüntülər göstərilməklə "Çıraqqala-Şabran" qoruğunun bələdçiləri - Fərzəliyev Tural, Hacıyeva Səmra, Meylaverdiyeva Aysel tərəfindən ətraflı məlumat veriləcək. Qeyd edək ki, tariximizin tanıdılması və təbliği məqsədilə həyata keçirilən yeni layihə əsasında təşkil olunan sərgi avqust-sentyabr ayları ərzində hər gün saat 10:00-dan 16:00-a kimi Soyqırımı Muzeyində davam edəcək. Bundan əlavə, arxeoloqların iştirakı ilə Kompleksdə Alban mədəniyyəti, şəhərsalma mədəniyyəti və bu kimi mövzular ətrafında Ustad dərsləri təşkil olunacaq. Tədbirdə regionun tarixlə əlaqəli müəssisələrinin əməkdaşları, tələbə və gənclər, mədəniyyət işçilərinin iştirakı planlaşdırılır.