Politoloq Ülkər Piriyeva

Bakı, 18 Oktyabr — Azadmedia.az

18 Oktyabr – Azərbaycan xalqının milli iradəsinin, dövlətçilik şüurunun və azadlıq amalının təntənəsi olan bir gündür. Bu tarix, əsrlər boyu müstəqillik uğrunda mübarizə aparmış bir xalqın yenidən öz taleyinə sahib çıxdığı gün kimi tarixə yazılıb. 1991-ci il 18 oktyabrda qəbul edilən “Azərbaycan Respublikasının Dövlət Müstəqilliyi haqqında Konstitusiya Aktı”, təkcə siyasi sənəd deyil, həm də milli ruhun dirçəliş manifestidir.

Bu bərpa — təkcə bir dövlətin deyil, həm də bir xalqın öz kimliyini, dilini, mədəniyyətini, milli varlığını qoruma əzminin təcəssümüdür. 1990-cı illərin mürəkkəb geosiyasi şəraitində, bölgədə cərəyan edən parçalanma prosesləri fonunda Azərbaycan xalqı tarix səhnəsində bir daha öz dövlət atributlarını bərpa edərək dünya xəritəsində azad və suveren dövlət kimi yer aldı.

Bu tarixi nailiyyətin ideya-siyasi əsasını Ulu Öndər Heydər Əliyev qoydu. O, müstəqilliyin sadəcə bərpasını deyil, onun möhkəmlənməsini və əbədiliyini təmin edən dövlət quruculuğu mərhələsini başlatdı. “Müstəqilliyi qorumaq onu qazanmaqdan daha çətindir” – deyən Heydər Əliyev, müstəqilliyin dövlət siyasətinə, xalqın həyat fəlsəfəsinə çevrilməsi üçün misilsiz siyasi iradə nümayiş etdirdi.

Bugün isə bu müstəqilliyin siyasi, iqtisadi və hərbi sütunlarını daha da möhkəmləndirən Prezident İlham Əliyev, Azərbaycanı regionun ən güclü dövlətinə çevirməkdədir. Onun rəhbərliyi ilə 44 günlük Vətən Müharibəsində qazanılan Böyük Zəfər, dövlət müstəqilliyimizin əsl təntənəsi oldu. Müstəqilliyin bərpası ilə başlanan milli oyanış, 2020-ci ilin Zəfəri ilə tarixi tamlığa qovuşdu.

Bu gün Azərbaycan – yalnız öz torpaqlarının deyil, həm də milli qürurunun və gələcəyinin sahibi olan bir dövlətdir. Ulu Öndərin “Azərbaycanın dövlət müstəqilliyi əbədidir, dönməzdir” kəlamı, bu gün gerçək siyasi reallığa çevrilib.

Müstəqilliyimiz – sadəcə bir tarix deyil, bir məsuliyyət, bir ideya, bir ruhdur. Bu ruh hər bir azərbaycanlının qəlbində yaşamalı, hər addımımızda dövlətçilik düşüncəsi ilə səslənməlidir.

Bu gün biz fəxr edirik ki, Ulu Öndər Heydər Əliyevin siyasi irsini və Prezident İlham Əliyevin müasir strategiyasını daşıyan bir nəsil kimi tarix qarşısında şərəfli bir yoldayıq.

18 Oktyabr – Azərbaycanın Müstəqilliyinin Bərpası Günü – bu, sadəcə keçmişin xatirəsi deyil, gələcəyə inamın, milli birliyin və əbədi dövlətçiliyin bayramıdır!