Ağstafa Rayon İcra Hakimiyyətinin başçısı Seymur Orucov Poylu kənd 2 saylı körpələr evi-uşaq bağçasına müdir təyin edib.

Azadmedia.az xəbər verir ki, bu vəzifəyə İcra Hakimiyyətinin İctimai-siyasi və humanitar məsələlər şöbəsinin baş məsələhətçisi Mehdiyeva Aysel Azad qızı gətirilib.

Lakin sözügedən təyinat sosial şəbəkələrdə birmənalı qarşılanmayıb. Belə ki, Poylu kənd sakinlərinin iddiasına görə, icra başçısı olmayan bağçaya müdir təyin edib.

Məsələ burasındadır ki, 2 saylı körpələr evi-uşaq bağçasının əvvəlki binası 2015-ci ildə rayonun sabiq icra başçısı Məhərrəm Quliyev tərəfindən sökdürülüb. Yeni binanın tikintisi üçün yer qazılsa da, 6 ildir ki, tikilməli olan uşaq bağçasından əsər-əlamət yoxdur.

Məsələ ilə bağlı "Qafqazinfo"ya açıqlama verən İcra Başçının müavini – İctimai-siyasi və humanitar məsələlər şöbəsinin müdiri Lalə Eyyubova bildirib ki, 2 saylı körpələr-uşaq bağçası hazırda fəaliyyət göstərir:

"Bağça hazırda köhnə tibb məntəqəsinin binasında yerləşir. Təzə bina üçün layihə də hazırlanıb. Texniki və sənədləşmə işləri də aparılıb. İkimərtəbəli olacaq binanın tikintisinə hələ başlanılmayıb. Sosial şəbəkələrdə paylaşılan foto bir neçə il əvvəl sökülən binanın yerini əks etdirir. Amma bu o demək deyil ki, bağça yoxdur. Bağçaya uşaqlar gəlir, işçiləri də var".

Emin Səfərov