“Bu gün iqtisadiyyat naziri Mikayıl Cabbarov, nəqliyyat, rabitə və yüksək texnologiyalar naziri Rəşad Nəbiyevin iştirakı ilə “Təhsil, innovasiyalar və iqtisadiyyat” mövzusunda panel müzakirəsində iştirak etdim”.

AzadMedia.az xəbər verir ki, bu barədə təhsil naziri Emin Əmrullayevin sosial şəbəkədəki paylaşımında deyilir.

“Elmi tədqiqatlar göstərir ki, bacarıqlara əsaslanan keyfiyyətli təhsil məhsuldarlığı və yaradıcılığı artırır, sahibkarlığı, innovasiyaları, texnoloji inkişafı və davamlı iqtisadi artımı təşviq edir.

Təhsil nəticələri uzun müddətdə iqtisadi artım tempini müəyyən edən əsas elementdir. Məhz bu nöqteyi-nəzərdən Təhsil Nazirliyi məktəbliləri kiçik yaşlardan etibarən yeni reallıqlara hazırlayır”, - nazir vurğulayıb.

Onun sözlərinə görə, rəqəmsal inqilabın tələblərinə cavab vermək üçün Azərbaycanda təhsil sahəsində mühüm işlər görülür:

“Hazırda ölkəmizdə 222 məktəbi əhatə edən rəqəmsal bacarıqlar layihəsi icra olunur. Layihəyə 120 mindən çox şagird cəlb olunub. Önümüzdəki illərdə bu sayın 200 minə çatdırılması nəzərdə tutulub.

Digər tərəfdən, infrastrukturun da tələblərə uyğun olması üçün məktəblərin fiber optik bağlantı imkanlarını genişləndiririk. Fiber optik qoşulma 2025-ci ilə qədər ölkə üzrə şagirdlərin 75 faizini əhatə edəcək.

Təhsil pillələri arasında uyğunluğu təmin etmək məqsədilə SABAH magistraturasında müasir əmək bazarının tələblərinə cavab verən yeni ixtisaslara dair proqramların tədrisinə də yer ayırmışıq.

Cəmiyyətin və gələcəyin dayanıqlı, rəqabətqabiliyyətli və innovativ meyarlar əsasında hazırlanması ölkəmizin yeni dövrə qədəm qoyduğunu göstərən mühüm məqamlardan biridir”.