Azərbaycan Respublikasının mədəniyyət naziri Anar Kərimov 25 noyabr 2021-ci il tarixində Yunanıstan Respublikasının ölkəmizdəki fövqəladə və səlahiyyətli səfiri Nikolaos Piperiqos ilə görüşdü.

Nazirlikdən Azadmedia.az-a verilən məlumata görə, Səfiri səmimi salamlayan nazir Anar Kərimov ikitərəfli münasibətlərin inkişafından məmnunluğunu ifadə etdi, o cümlədən mədəniyyət sahəsində əməkdaşlığın daha da genişləndirilməsi üçün əlverişli imkanların mövcudluğunu diqqətə çatdırdı.

Ölkələrimiz arasında birgə fəaliyyətin əhəmiyyətini qeyd edən nazir qarşılıqlı maraq kəsb edən sahələrin müəyyənləşdirilməsi, konkret layihələrə əsaslanan əməkdaşlığın inkişaf etdirilməsi, kinematoqrafiya, arxeologiya, ölkəmizdə xüsusilə işğaldan azad edilmiş ərazilərdə mədəni abidələrin bərpası, qurumlararası və beynəlxalq təşkilatlar çərçivəsində əməkdaşlığın genişləndirilməsinin vacibliyini vurğuladı.

Səfir Nikolaos Piperiqos qəbula görə təşəkkür edərək, ölkələrimiz arasında mədəni əlaqələrin daha da inkişaf etdirilməsi məqsədilə müəyyən edilən istiqamətlər üzrə fəaliyyət planlarının tərtib edilməsi, hər iki ölkədə müvafiq sahələrdə qurumlar arasında birbaşa əməkdaşlığın təşviq edilməsi və digər bu kimi həyata keçirilə biləcək layihələrlə bağlı fikirlərini səsləndirdi.

Görüş qarşılıqlı maraq doğuran digər məsələlərin müzakirəsi ilə davam edib.