Yaxın üç gün ərzində yenidən Azərbaycan prezidenti seçilmiş İlham Əliyevin andiçmə mərasimi keçiriləcək.

Konstitusiyanın 103-cü maddəsinə uyğun olaraq, seçilmiş Azərbaycan Prezidenti seçkilərin nəticələrinin təsdiq edildiyi gündən başlayaraq üç gün müddətində Konstitusiya Məhkəməsi hakimlərinin iştirakı ilə and içir.

Azərbaycan Respublikasının Prezidenti and içdiyi gündən öz səlahiyyətlərini həyata keçirməyə başlamış hesab edilir.

Azərbaycan Konstitusiya Məhkəməsi bu gün fevralın 7-də keçirilmiş prezident seçkilərinin nəticələrini təsdiqləyib.

Konstitusiya Məhkəməsinin qərarına əsasən, Mərkəzi Seçki Komissiyasının yekun protokoluna əsasən, İlham Əliyev 92,12 faiz səslə prezident seçkilərində qalib gəlib.