ABŞ Şimali Koreyanın nüvə proqramının maliyyələşdirilməsində şübhəli bilinən 10 nəfərə və bir təşkilata sanksiya tətbiq edib

ABŞ Şimali Koreyanın nüvə proqramının maliyyələşdirilməsində iştirak etməkdə şübhəli bilinən 10 fiziki şəxsə və bir təşkilata qarşı yeni sanksiyalar tətbiq edib.

Reuters agentliyinin məlumatına görə, sanksiyalar xaricdə Şimali Koreya İT mütəxəssislərinin işə düzəldilməsi sxemlərində iştirak etdiyi ehtimal olunan şəxslərə şamil edilib.
ABŞ Maliyyə Nazirliyinin məlumatına əsasən, Pxenyan həmin mütəxəssislərin qazancının böyük hissəsini kütləvi qırğın silahları və ballistik raket proqramlarının maliyyələşdirilməsinə yönəldir.

Sanksiya siyahısına vasitəçilər, eləcə də Şimali Koreyada və Rusiyada fəaliyyət göstərən Şimali Koreya İT mütəxəssisləri daxil edilib. Məhdudiyyətlərin tətbiq olunduğu qurumlar arasında First Financial and Technical Development Center də var. ABŞ Maliyyə Nazirliyinin məlumatına görə, siyahıya daxil edilən altı şəxs bu təşkilatla əlaqəlidir.