Alimlər müəyyən ediblər ki, insanın bədənindəki müəyyən hissədə yaranan hisslərə diqqət yetirməsi orqanizmin iltihabi reaksiyanı daha effektiv tənzimləməsinə kömək edə bilər. Araşdırmanın nəticələrinə görə, iltihabın ocağına diqqət yetirən insanlarda reaksiya diqqəti yayındırılan şəxslərlə müqayisədə təxminən 1,5 dəfə zəif olub. Tədqiqat Nature Human Behaviour jurnalında dərc edilib.

İki təcrübədə ümumilikdə 57 sağlam könüllü iştirak edib. Birinci təcrübədə 37, ikinci təcrübədə isə 20 nəfər olub. İltihab dəridə histamin testi vasitəsilə yaradılıb. Daha sonra 20 dəqiqə ərzində əmələ gələn qabarcığın və ətrafındakı qızartının ölçüsü iki vəziyyətdə müqayisə edilib: iştirakçı hissə diqqətini yönəltdikdə və diqqəti başqa tapşırığa yayındırıldıqda.

Nəticədə iştirakçıların təxminən 90 faizində reaksiya diqqət yayındırıldıqda daha güclü olub. Diqqətini bədən hissinə yönəldənlərdə qabarcığın orta ölçüsü 3,5 mm, diqqəti yayındırılanlarda isə 5 mm təşkil edib.

Bundan əlavə, diqqətini iltihab ocağına yönəldən şəxslərdə qabarcığın böyüməsi daha tez dayanıb və geriləmə başlayıb. 20 dəqiqədən sonra bu qrupun təxminən 90 faizində reaksiya sabitləşib və ya azalıb. Diqqəti yayındırılan qrupda isə bu göstərici 46 faiz olub.

Dərinin lidokainlə keyləşdirilməsi diqqətin müsbət təsirini azaldıb, lakin təsiri tam aradan qaldırmayıb. Bu isə prosesdə bir neçə mexanizmin iştirak etdiyini göstərir.

Tədqiqat müəllifləri mümkün mexanizmlərdən biri kimi iltihabın tənzimlənməsində iştirak edən vagus sinirinin fəaliyyətini göstərirlər. İnsan öz bədənindəki hisslərə diqqət yetirdikdə ürək ritminin dəyişkənliyi artıb ki, bu da vagus sinirinin aktivliyi ilə əlaqələndirilir.

Beləliklə, araşdırma göstərir ki, diqqətin bədən hisslərinə yönəldilməsi yalnız psixoloji vəziyyətə deyil, orqanizmin fizioloji və iltihabi reaksiyalarına da təsir göstərə bilər.