Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı və "Öyrədərək Öyrənirik" Gənclərin İntellektual İnkişafına Dəstək İctimai Birliyinin təşkilatçılığı ilə icra olunan "Solo Brain" fərdi intellektual turnir layihəsi çərçivəsində keçirilən bilik yarışının qrup mərhələsinə start verilib.

QHT.az xəbər verir ki, qrup mərhələsində ümumilikdə seçim turunda ən yaxşı nəticə göstərən 16 gənc mübarizə aparır. Bu gün "A" və "B" qrupunun oyunları keçirilib. "Breyn Rinq" formatında baş tutan oyunların hər birində 16 sual səsləndirilib. Yekun nəticələrə əsasən, "A" qrupundan Qılınc Cəfərov və Rəqsanə Mehdiyeva, "B" qrupundan isə Elturan Göyüşovla Nəsir Allahverdiyev suallara ən çox düzgün cavab verərək yarımfinal mərhələsinə vəsiqə qazanıb.

Sabah "C" və "D" qrupunun oyunları keçiriləcək. Qrupların hər birində ən çox xal toplayan 2 gənc yarımfinala, oradan isə 4 ən güclü finala adlayacaq. Yarımfinal oyunları 30 sentyabr, final isə 1 oktyabrda keçiriləcək. Finalda ilk üç yeri tutan gənclər müvafiq kubok, diplom və qiymətli hədiyyələrlə təltif olunacaqlar.