Mamoy Mansurov,
Bakı Dövlət Universitetinin Geologiya fakültəsinin dekanı

Adı Azərbaycan xalqının tarixinə qızıl hərflərlə yazılmış böyük lider Heydər Əliyev yalnız ölkəmizin deyil, bütün Türk dünyasının qürur simvoludur. O, Azərbaycan tarixində əvəzolunmaz şəxsiyyət kimi öz parlaq izini qoymuşdur. Heydər Əliyevin müdrik rəhbərliyi, uzaqgörən siyasəti və xalqa olan tükənməz sevgisi sayəsində müstəqilliyimiz gücləndirilmiş, ölkəmiz beynəlxalq aləmdə tanınmışdır.

Hər il 12 dekabrda Azərbaycan xalqı ulu öndəri dərin ehtiramla yad edir. Onun xatirəsi yalnız bir günlə məhdudlaşmır, çünki Heydər Əliyevin əməlləri və ideyaları hər bir azərbaycanlının qəlbində yaşayır.

Heydər Əliyevin siyasi irsinin ən mühüm sütunlarından biri onun milli-mənəvi dəyərlərə verdiyi dəyər idi. Azərbaycan mədəniyyəti, dili və ənənələrinin qorunması onun siyasətinin əsas prioritetlərindən biri olmuşdur. Məhz onun təşəbbüsü ilə Azərbaycan dilinin dövlət dili kimi mövqeyi möhkəmləndirilmiş, milli-mədəni irsimiz dünya miqyasında tanıdılmışdır.

Ulu öndərin müstəqilliyimizin ilk illərində ölkəni xaosdan xilas etməsi onun liderlik bacarığının ən parlaq nümunəsidir. Heydər Əliyevin hakimiyyətə qayıdışı ilə Azərbaycanda siyasi sabitlik bərqərar olmuş, iqtisadi inkişafın təməli qoyulmuşdur. "Əsrin müqaviləsi"nin imzalanması ilə ölkəmiz dünyanın diqqət mərkəzinə çevrilmiş, beynəlxalq enerji bazarına inteqrasiyası təmin olunmuşdur.

Heydər Əliyevin irsinin qorunub saxlanılması və onun ideyalarının davam etdirilməsi onun siyasi varisi, Prezident İlham Əliyevin rəhbərliyi ilə uğurla həyata keçirilir. Onun qurduğu müasir Azərbaycan bu gün regionun lider dövlətlərindən birinə çevrilmişdir.

Heydər Əliyev yalnız bir dövlət xadimi deyil, həm də xalqına dərindən bağlı bir insan idi. Onun "Xalq dövlət üçün deyil, dövlət xalq üçün olmalıdır" prinsipi bu gün də hər bir azərbaycanlının həyatında öz əksini tapır.

Ulu Öndər Heydər Əliyevin xatirəsi əbədi yaşayacaqdır. O, hər birimizin qəlbində milli birlik, müstəqillik və inkişaf rəmzi kimi qalacaq. Bu gün biz onun yaratdığı müasir Azərbaycan Respublikasını daha da gücləndirmək üçün çalışırıq. Onun ideyalarını yaşatmaq bizim hər birimizin müqəddəs borcudur. Ruhu şad olsun!