Zorakılığa susmaq olmaz – uşaqların səsi olaq!

Son günlərdə sosial şəbəkələrdə yayılan və bir uşağa qarşı seksual xarakterli hərəkətləri əks etdirən görüntülər cəmiyyətdə dərin sarsıntı və haqlı hiddət doğurub. Uşağın hüquqlarının və mənəvi bütövlüyünün bu qədər kobud şəkildə pozulması, bir daha göstərdi ki, zorakılıqla mübarizə təkcə hüquq-mühafizə orqanlarının işi deyil – bu, bütün cəmiyyətin üzərinə düşən mənəvi borcdur.

Bu kontekstdə Uşaq və Qadın Qaynar Xəttinin rəhbəri Kəmalə Aşumova tərəfindən yayılan ictimai müraciət böyük rezonans doğurub. O bildirir ki, uşaqlara qarşı zorakılığın istənilən forması qətiyyətlə pislənilməli, hər bir belə hadisədə məsuliyyət daşıyan şəxslər qanun qarşısında cavab verməlidirlər. Müraciətdə hüquq-mühafizə orqanlarının bu cür cinayətlərə qarşı sərt mövqeyi alqışlanır və tam dəstəklənir.

Lakin məsələ təkcə cinayətkarın cəzalandırılması ilə bitmir. Kəmalə Aşumova cəmiyyətə bir neçə həyati vacib mesaj ünvanlayır:

Zorakılıq videolarını paylaşmayın! Valideynlərin, maarifçilərin və hətta jurnalistlərin də bəzən "aydınlıq gətirmək" niyyəti ilə paylaşdığı bu videolar, əslində, uşaq üçün ikinci bir travmadır. Uşağın hüquqları pozulur, şəxsiyyəti cəmiyyətin gözləri önündə təkrar-təkrar əzilir.

Risk əlamətlərinə diqqət edin. Uşağın qəfil davranış dəyişiklikləri, ünsiyyətdən yayınması, qorxu və narahatlıq kimi siqnallar onun təhlükə altında olduğunu göstərə bilər.

Maarifləndirmə erkən yaşlardan başlamalıdır. Uşaqlar öz bədənlərinin sərhədlərini anlamalı, "mənim bədənim mənə aiddir" prinsipini qəbul etməlidirlər.

Uşaqları dinləyin və qoruyun. Onlar bəzən qorxudan və ya utancdan danışa bilmirlər. Bu zaman böyüklər diqqətli, həssas və müdafiəkar mövqe sərgiləməlidirlər.


Qaynar Xəttin 116111 nömrəsi ilə fəaliyyət göstərən xidməti 24 saat ərzində anonim və peşəkar dəstək göstərir. Hər bir insan bu xəttə zəng etməklə, bir uşağın həyatını dəyişə bilər. Eyni zamanda, təşkilatın sosial şəbəkələr üzərindən də onlayn məsləhətləşmə imkanı mövcuddur.

Kəmalə Aşumova bu platformanı sadəcə bir yardım xətti deyil, ictimai vicdanın və həmrəyliyin təzahürü kimi dəyərləndirir:
"Uşaqları qorumaq dövlətin və cəmiyyətin birgə borcudur. Susmaqla cinayətə şərik olmayaq. Hər birimiz uşaqların təhlükəsiz gələcəyi naminə danışmalı, xəbərdar etməli və müdaxilə etməliyik. Profilaktika – zorakılığın qarşısını almaq – bizim ortaq məsuliyyətimizdir."
Cəmiyyətdə getdikcə artan zorakılıq hallarının qarşısı yalnız ayıq və həssas cəmiyyət modeli ilə alına bilər. Valideynlər, müəllimlər, qonşular, sosial işçilər, həkimlər və sadə vətəndaşlar – hər kəsin rolu əvəzolunmazdır.

Uşaqları qoruyaq – birlikdə, vicdanla, məsuliyyətlə.