İsrail ABŞ-dan asılılığı azaltmaq üçün aviabombaların yerli istehsalını genişləndirəcək

İsrail yaxın iki il ərzində idarəolunan aviabombaların kütləvi yerli istehsalını təşkil etməyi planlaşdırır. Məqsəd silah tədarükündə ABŞ-dan asılılığı azaltmaqdır. Bu barədə The Jerusalem Post nəşri məlumat yayıb.

Məlumata görə, milli sursat istehsalının genişləndirilməsi ilə bağlı qərar hələ 2024-cü ildə həmin dövrün müdafiə naziri Yoav Qallantın təşəbbüsü ilə qəbul edilib. Buna səbəb ABŞ Prezidenti Co Bayden administrasiyasının İsrailə bəzi silah növlərinin tədarükünə qismən məhdudiyyətlər tətbiq etməsi olub. Bundan əvvəl İsrail onilliklər ərzində aviabombala
rın təminatında əsasən ABŞ istehsalına arxalanırdı.
İsrail Müdafiə Nazirliyinin baş direktoru Amir Baram bildirib ki, hazırda əsas prioritetlərdən biri aviasiya sursatlarının istehsal gücünün artırılmasıdır.

Onun sözlərinə görə, ölkə istifadə edilmiş bütün sursat ehtiyatlarını bərpa edir və mümkün hərbi ssenarilərə hazırlaşır. Baram qeyd edib ki, İrana qarşı əməliyyatlardan əvvəl qəbul edilən istehsal xətlərinin genişləndirilməsi qərarları yaxın vaxtlarda istehsal həcmini əhəmiyyətli dərəcədə artırmağa imkan verəcək.

The Jerusalem Post yazır ki, İsrail artıq adi sərbəst düşən aviabombaları yüksək dəqiqlikli silaha çevirən yerli istiqamətləndirmə sistemləri istehsal edir. Lakin mövcud istehsal gücü ölkənin tələbatını tam ödəmir. Buna görə də hökumət istehsalın əhəmiyyətli dərəcədə artırılmasını planlaşdırır. Yeni sursatların texniki xüsusiyyətləri və istehsal həcmi isə açıqlanmayıb.