Rusiya və Ukrayna nümayəndə heyətləri İstanbulda birbaşa danışıqlara başlayıblar - bu, artıq bu il üçüncü raunddur. Bundan əvvəlki ikisi də İstanbulda baş tutub. Rusiya nümayəndə heyətinə Vladimir Medinski başçılıq edir.
Moskva və Kiyev nümayəndələri İstanbulda birbaşa danışıqlar aparırlar.

CNN Türk xəbər verir ki, Rusiya və Ukrayna nümayəndə heyətlərinin görüşü Çırağan sarayında keçirilir.

Danışıqların üçüncü raundunda Rusiya nümayəndə heyətinə Rusiya prezidentinin köməkçisi Vladimir Medinski, Ukrayna nümayəndə heyətinə isə Milli Təhlükəsizlik Şurasının katibi Rustem Umerov rəhbərlik edir.

Danışıqların əvvəlində Türkiyənin xarici işlər naziri Hakan Fidan Rusiya prezidenti Vladimir Putin, ABŞ prezidenti Donald Tramp və Vladimir Zelenskiyə danışıqların təşkilində göstərdikləri səylərə görə təşəkkürünü bildirib.

Onun sözlərinə görə, Ankara dünya ictimaiyyətinin Rusiya-Ukrayna danışıqlarının ilk iki raundunun nəticələrini yüksək qiymətləndirdiyini bəyan etməkdən məmnundur. Diplomat qeyd edib ki, danışıqların yekun məqsədi atəşkəsə nail olmaqdır.

Nazir əlavə edib ki, Türkiyə tərəfi danışıqların uğuruna ümid edir. Fidan Türkiyənin Ukraynanın tənzimlənməsində vasitəçi missiyasını davam etdirəcəyinə də aydınlıq gətirib.

Açılış nitqindən sonra danışıqlar mətbuata qapalı formatda davam etdirilib.

Medinski bu gün səhər saatlarında Kiyev nümayəndə heyətinin danışıqlarda sammit görüşü ilə bağlı razılığa gəlmək niyyəti barədə eşitdiyini bildirib.

Xatırladırıq ki, birbaşa Rusiya-Ukrayna danışıqlarının birinci raundu mayın 16-da, ikincisi isə iyunun 2-də baş tutub. Hər ikisi üçüncüsü kimi İstanbulda keçirilib.