ONLAR DAİM ÜRƏKLƏRDƏ YAŞAYACAQLAR…


19 aprel 2022-ci il, Azadmedia.az

Masallı rayonunun “Ağakişibəyli-Şərəfə” kəndinin mərkəzində Böyük Vətən müharibəsi və Qarabağ şəhidlərinin şərəfinə yenidən qurulan «Şəhidlər» abidə-kompleksinin açılışı olub.

Masallı Rayon İcra Hakimiyyətinin başısı Şahin Məmmədov və aparatı, hüquq-mühafizə orqanlarının rəhbərlərinin, şəhid ailələrinin, qazilərin, döyüşçülərin, müharibə veteranlarının, kənd sakinləri, ictimaiyyət və mətbuat nümayəndələrinin iştirak etdiyi tədbirdə əvvəlcə respublikamızın ərazi bütövlüyü uğrunda canından keçmiş Vətən övladlarının xatirəsini bir dəqiqəlik sükutla yad edilib.

Abidə kompleksi ilə tanışlıq zamanı bildirildi ki, respublikanın hər yerində olduğu kimi, Masallıda da Qarabağ və Böyük Vətən müharibələrində həlak olanların xatirəsi daim əziz tutulur.
Masallı Rayon İcra Hakimiyyətinin başçısı Şahin Məmmədov çıxış edərək, tarixə 44 günlük müharibə kimi düşən Vətən müharibəsindən, Azərbaycan Ordusunun qəhrəmanlığından, qazandığı şanlı Qələbədən, şəhidlərin gənclərə nümunə olan qısa, lakin şərəfli ömür yolundan danışıb. Vətən müharibəsində şəhidlərin qanının yerdə qalmadığı, Müzəffər Ali Baş Komandan cənab İlham Əliyevin rəhbərliyi ilə torpaqlarımızın işğaldan azad edildiyi, böyük Qələbənin tarixi əhəmiyyəti xüsusi qeyd edilib.

Rayon rəhbəri geniş nitqində daha sonra vurğulayıb ki, Şərəfə zialılar kəndidir. Bu gün sonuncu masallı şəhidimiz, 3 medallı — «Füzulinin azad olunmasına görə», «Vətən uğrunda» və «Cəsur döyüşçü» medallı Nurlan Fərrux oğlu Əbilovun birinci il mərasimidir.
Biz Nurlan kimi gənclərimizlə hər zaman qürur duyacağıq! Onun və cəbhə yoldaşlarının vətənpərvərliyi sayəsində torpaqlarımız Ermənistanın işğalından azad olunub, xalqımızın 30 illik həsrətinə son qoyulub. Kənd sakinləri Böyük Vətən müharibəsində də qəhrəmanlıq nümayiş etdirmişlər. Şəhid ailələrinə və əlillərə daim dövlət qayğısı göstərilir.

İcra başçısı Şahin Məmmədov «Şəhidlər» abidə-kompleksinin təşəbbüsçüsü olmuş Şərəfə kənd folklor kollektivinin rəhbəri Dürdanə Hüseynovaya və zəhməti keçən hər kəsə minnətdarlıq bildirdi.

Tədbirdə həmçinin Millət vəkili Məşhur Məmmədovun adına köməkçiləri - Əli Nağıyev, Hekayət Nəzərov və Rəmzi Şahverdiyev də iştirak ediblər.

Tədbirdə digər çıxış edən, Vətən müharibəsi Qəhrəmanı, Ağakişibəyli kənd şəhidi Polkovnik-leytenant Ramiz Cəfərovun həyat yoldaşı Sitarə Cəfərova, Bakı Dövlət Universiteti Coğrafiya fakültəsinin dekanı, dosent Şəkər Məmmədova, veteran müəllim Xankişi Xankişiyev, Şərəfə kənd folklor kollektivinin rəhbəri Dürdanə Hüseynova və başqaları kəndin şəhidlərindən, onların Vətən və 1941-1945-ci il Böyük Vətən müharibəsində göstərdikləri şücaətdən, ordu-xalq-iqtidar birliyindən danışıb, şəhidlərin xatirəsinin daim qəlblərdə yaşayacağını bildiriblər.

Tədbirdə Ağakişibəyli kənd şəhidi Qəhrəman İsmayılov adına Şərəfə kənd orta məktəbinin şagirdləri, şəhid övladları Vətənə, ordumuza, şəhidlərimizə həsr olunan şeirlər söyləyiblər.

Sonra rayon rəsmiləri və tədbir iştirakçıları böyük Vətən və Azərbaycanın müstəqilliyi və ərazi bütövlüyü uğrunda mübarizədə canlarından keçən qəhrəman Vətən övladlarının xatirəsinə ucaldımış «Şəhidlər» abidə-kompleksinin önünə qərənfillər qoydular.

Şəhid ailələri və qazilər onlara göstərilən diqqət və qayğıya görə Azərbaycan Prezidenti cənab İlham Əliyevə, Birinci vitse-prezident Mehriban xanım Əliyevaya və Masallı rayon İcra hakimiyyətinin başçısına minnətdarlıqlarını bildiriblər. Sonra tədbir kəndin mərasim evində davam etdirilib.
Mərasimdə icra başçısı Şahin Məmmədov çıxış edərək qeyd edib ki, Masallıda bütün şəhid ailələri bir məğrurluq nümayiş etdirdilər. Mən şəhid ailələrinə təşəkkür edirəm. Onlar özlərini əsl vətənpərvər kimi aparırlar.

- Mən qazilərimizə təşəkkür edirəm. Allah möhtərəm Prezidentimizi, ailəsini, millətimizi, Masallımızı, masallıları qorusun. Əgər erməniyə dəstək verən dövlətlər olmasaydı torpaqlarımız 30 il düşmən tapdağı altında qalmazdı. Allah Nurlan balamızı, bütün şəhidləri rəhmət eləsin,— deyə Masallı RİH başçısı nitqində bir daha qeyd edib.

Mərasimdə Qafqaz Müsəlmanları İdarəsinin Masallı rayonu üzrə qazısı Ağa Rəşid Talıbov, QMİ-nin səlahiyyətli nümayəndəsi Hacı Məftun Hüseynov və başqaları “Qurani-Kərim”dən ayələr oxuyub, ölkə başçımıza, ölkəmizə, millətimizə dualar ediblər.

Sonra mərasim iştirakçıları Ağakişibəyli-Şərəfə kənd qəbiristanında Nurlan Fərrux oğlu Əbilovun məzarını ziyarət ediblər

Şəhidin xatirəsi ehtiramla anılıb, məzarı üstünə təzə güllər düzülüb.
Çıxışlarda şəhid barədə xatirələr danışılıb, Ağakişibəyli kəndinin şəhidi Nurlan Fərrux oğlu Əbilovun heç vədə unudulmayacağı, daim ürəklərdə yaşayacağı bildirilib...
ƏLİHÜSEYN ŞÜKÜROV









ÜLKƏR PİRİYEVA