“İntihar! - Olduqca həssas və gündəmi demək olar ki zəbt edən bir məsələdir. Nə acı ki, hər keçən zaman biraz daha da artan və çoxalan intihar meylləri..
Çox ağırdır bu mövzuda danışmaq, müzakirə etmək və səbəbləri araşdırmaq. Ağır olduğu qədəri ilə də müzakirəsi vacib bir hadisədir.

Qeyd edim ki, ölkəmizdə intiharlarla bağlı rəsmi statistika yoxdur. Biz qeyri-rəsmi statistikaya əsaslanır və yaxud araşdırmalara istinad edərək cəmiyyətimizdəki intihar halları barədə qeydlər apara bilirik.
Belə qeyri-rəsmi araşdırmalara əsasən deyə bilərik ki, son dörd ildə intihar nəticəsində 1100-ə qədər insan həyatına son qoyub.
Əlbəttə, kifayət qədər böyük bir say ölçüsüdür. Son intihar göstəricilərinə baxsaq görərik ki, intiharların 40 faizi yeniyetmələr arasında baş verib.
Müşahidə edirik ki, intihar halları xüsusilə gənclər - abituriyentlər və şagirdlər arasında üstünlük təşkil edir.

Nədir səbəb? Niyə bu hallar baş verir? Niyə cəmiyyət olaraq buna konkret yox deyə bilmirik? Hardadır boşluqlarımız?

Əslində səbəb olaraq bir çox hal göstərə bilərik, amma intihara meyl edənlərin daha çox hansı sferaya uyğun insanlar olduğunu görərkən fikirlərimiz bir məcraya yönələ bilir.

Fikrimcə, bu məsələni ümumilikdə təhsil ekspertləri və təhsilimizə xidmət edən insanlarla daha çox müzakirə etməliyik.



Səbəblərdən digəri isə ailə faktorudur. Ailədə övladına müsbət dəstəyin olmaması, stimul verici söhbətlərin aparılmaması, qorxu, bəzən psixoloji şiddət (imtahandan keçməsən evə gəlmə) kimi ifadələr sagirdlərdə və abituriyentlərə özgüvən hissini sıfıra endirir. Bu kimi hallar yolverilməzdir. Valideyn hər nə olur olsun övladının yanında olmalı, ona psixoloji dəstək göstərməlidir. İmtahandan keçməmək, kəsilmək həyatın sonu demək deyil. Növbəti cəhddə bir addım deməkdir.

Daha bir nüans isə ailə daxili problemlərdir ki, onlar da intihara gədər gətirib çıxara bilir.



Bunlarla da bitmir, eyni zamanda, gözə görünməyən, sezilməyən, bizə qaranlıq qalan bir çox məqamlar.. O, məqamlar ki, hələ həyata yeni atılmış, bəlkə də cəmiyyətin möhkəm sütunlarından ola biləcək fərdləri qurban edir və həyatla vidalaşdırır.

Bu baxımdan ailələrimiz cəmiyyət üçün yetişdirdiyimiz övladlarımıza əsas faktor kimi özgüvən, özünə inam, cəhd etmək, usanmamaq, mübariz olmaq kimi amilləri daha çox aşılamalı və özününkiləşdirməlidir. Bu bizim mənəvi borcumuzdur.

Unutmayın ki, bizim övladlarımız arzuladığımız kimi deyil, yetişdirdiyimiz kimi cəmiyyətə təqdim olunur.
Bu gün düşünürəm ki, hamı həyəcan təbili çalmalıdır.”


Mən də, Azadmedia.az vasitəsilə fürsətdən istifadə edib gənclərimizə səslənirəm!

Əzizlərim, heç nəyə və heç kimə görə dəymir ki, canımıza qəsd edək, intihara meyllənək, pis vərdişlərə aludə olaq.

Əziz Azərbaycan gəncliyi!
Siz güclü, özgüvənli, layiqli, bacarıqlı obraz olaraq hər kəsi heyran qoymalısınız, siz güclü, qalib ölkənin azad, sərbəst, yaradıcı gənclərisiniz!

Gələcəyimiz sizə əmanətdir, sizinlə birgə çiçəklənən gələcəyə yol alacağıq. Sizə güvənir, etibar edir və inanırıq!

Reportajı hazırladı: Ülkər Piriyeva