Rusiya Xarici İşlər Nazirliyi 4 avstriyalı diplomatın düşmənçilik və ədalətsiz addımlar ataraq iki ölkə arasındakı münasibətlərə xələl gətirdiyi səbəbilə ölkədən çıxarılacağını açıqlayıb.

Azadmedia.az xarici KİV-ə istinadən xəbər verir ki, Rusiya ilə Avstriya arasında siyasi gərginlik artır. Nazirlik Avstriyanın Moskvadakı səfirini nazirliyə çağıraraq Avstriya səfirliyindəki 4 diplomatın persona non-qrata elan edildiyini bildirib. Diplomatlar fevralın 23-dək Rusiyanı tərk etməlidirlər.

Qeyd edək ki, Avstriya Xarici İşlər Nazirliyinin fevralın 2-də verdiyi açıqlamada 2-si Birləşmiş Millətlər Təşkilatı (BMT) tərəfindən akkreditə olunmuş 4 rusiyalı diplomatın ölkədən çıxarılacağı bildirilmişdi. Nazirlik bəyan etmişdi ki, Rusiya səfirliyindəki 2 diplomat “diplomatik statusları ilə bir araya sığmayan hərəkətlər edib”, bundan başqa, BMT-nin paytaxt Vyanadakı daimi nümayəndəliyindəki 2 diplomat isə “Qərargah haqqında razılaşmaya uyğun olmayan hərəkətlər edib”. Buna görə də, Diplomatlara Avstriyanı tərk etmək üçün bir həftə vaxt verilmişdi.


Ü. Piriyeva