Keçmiş ABŞ kəşfiyyatçısı: İran Trampı "eqo tələsinə" salıb

ABŞ hərbi kəşfiyyatının keçmiş əməkdaşı Maykl Preqent hesab edir ki, İran Prezidenti Donald Trampı "eqo tələsinə" salıb və bu vəziyyət Vaşinqtonu daha sərt addımlar atmağa sövq edə bilər.

Onun Bild nəşrinə verdiyi açıqlamaya görə, Tehran Tramp və vitse-prezident Cey Di Vensi İranla imzalanması planlaşdırılan Anlaşma Memorandumu (MoU) fonunda çətin vəziyyətdə qoyub. Preqent bildirib ki, sənədin demək olar bütün bəndləri İrana güzəşt kimi görünürdü.

Keçmiş kəşfiyyatçının sözlərinə görə, Tramp razılaşma naminə İran limanlarına tətbiq olunan blokadanı aradan qaldırmağa, neft ixracına qarşı sanksiyaları dayandırmağa, həmçinin təxminən 110 milyard dollar dondurulmuş aktivlərin açılmasına və 300 milyard dollarlıq bərpa fondunun yaradılmasına razılıq verməyə hazır idi. Lakin Tehranda sərt xətt tərəfdarlarının üstünlük qazanması və Hörmüz boğazına nəzarətdən imtina edilməməsi bu planların baş tutmasına mane olub.

Preqent hesab edir ki, Trampın nüfuzuna zərbə vurulması vəziyyəti daha da təhlükəli edir. Onun fikrincə, ABŞ prezidenti təzyiq və ya alçaldıldığını hiss etdikdə impulsiv qərarlar verməyə meyllidir.

Bu fonda Vaşinqtonda İrana qarşı hücum əməliyyatlarının genişləndirilməsi, strateji əhəmiyyətli adaların ələ keçirilməsi və Fars körfəzində ərazi nəzarətinin gücləndirilməsi kimi ssenarilərin müzakirə edildiyi bildirilir.

Məqalədə qeyd olunur ki, The Wall Street Journal da Tramp administrasiyasında prezidentin hərbi eskalasiyaya daha çox meyilli olduğunu yazıb. Nəşrin məlumatına görə, Tramp vitse-prezident Cey Di Vens, müdafiə naziri Pit Heqset, dövlət katibi Marko Rubio və general Den Keynlə birlikdə mümkün hərbi əməliyyat variantlarını müzakirə edib.

Maykl Preqent ABŞ-ın İrana qarşı daha uzunmüddətli hərbi kampaniyaya hazırlaşa biləcəyini istisna etməsə də, bildirib ki, Tehranın mümkün yeni təxribatı və ya qarşı hücumu Vaşinqtonun strategiyasını qısa müddətdə yenidən dəyişə bilər.