Çexiyada quraqlıq kənd təsərrüfatına ağır zərbə vurdu: bəzi bölgələrdə məhsul itkisi 40 faizə çatıb

Çexiyada uzunmüddətli quraqlıq kənd təsərrüfatında ciddi itkilərə səbəb olub.
Mütəxəssislərin məlumatına görə, ölkənin bəzi bölgələrində buğda, arpa və rapsın məhsuldarlığı əvvəlki illərin orta göstəricisi ilə müqayisədə 30–40 faiz azalıb. Quraqlıqdan ən çox Çexiyanın cənub və qərb rayonları zərər çəkib.

Məhsulun həcminin azalması ilə yanaşı, onun keyfiyyətində də pisləşmə müşahidə olunur. Heyvandarlıqda istifadə edilən samanın istehsalı da əhəmiyyətli dərəcədə azalıb.
Quraqlıq daha gec yığılan qarğıdalı və şəkər çuğundurunu da təhlükə qarşısında qoyub. Ölkənin cənub və qərb hissələrində bu bitkilərin məhsuldarlığının 40 faizdən çox azalacağı proqnozlaşdırılır. Mütəxəssislər xəbərdarlıq edirlər ki, məhsulun formalaşması baxımından kritik dövr olduğu üçün vəziyyət yaxın günlərdə daha da ağırlaşa bilər.

Çexiyadakı ərazinin təxminən 60 faizində torpağın nisbi rütubəti 10 faizdən aşağı düşüb. Bu göstərici bitkilərin solma həddinə yaxın hesab olunur. Ölkə ərazisinin 55 faizində isə artıq müstəsna və ya ekstremal quraqlıq qeydə alınıb.
Havanın yaxın günlərdə yenidən istiləşəcəyi gözlənilir. Həftəsonu temperaturun 35 dərəcəyə yüksələcəyi, əhəmiyyətli yağıntıların isə yalnız gələn həftənin əvvəlində düşəcəyi bildirilir. Bu halda ekstremal quraqlığın ölkə ərazisinin 70 faizinə qədərini əhatə edə biləcəyi ehtimal olunur.

Quraqlıqdan yalnız taxıl və raps sahələri deyil, qarğıdalı, kartof, şəkər çuğunduru, soya, üzüm bağları və meyvə ağacları da zərər çəkib. Ən ağır vəziyyət yem bitkiləri, biçənəklər və otlaqlarda yaranıb.

Fermerlər heyvanların əlavə yemlə təmin edilməsinə əvvəlkindən daha tez başlamağa məcbur olublar. Onlar ot, saman və digər yem ehtiyatlarının çatışmazlığından narahatdırlar. Çexiya Kənd Təsərrüfatı İstehsalçıları İttifaqı xəbərdarlıq edib ki, yem çatışmazlığı iribuynuzlu mal-qaranın sayının azalmasına və bunun nəticələrinin növbəti illərdə də kənd təsərrüfatına təsir göstərməsinə səbəb ola bilər.

Çexiya statistika qurumunun hesablamalarına görə, bu il ölkədə əsas taxıl məhsullarının ümumi həcmi təxminən 6,39 milyon ton olacaq. Bu, ötən illə müqayisədə 16,9 faiz azdır. Raps istehsalının isə 808 min ton civarında olacağı və 20 faizdən çox azalacağı gözlənilir.

Bununla belə, Çexiyanın Kənd Təsərrüfatı Nazirliyi ölkənin ərzaqla özünütəminatına təhlükə olmadığını bildirir. Analitiklərin fikrincə, məhsuldarlığın azalması ərzaq qıtlığına və qiymətlərin kəskin artmasına mütləq səbəb olmayacaq. Taxıl çatışmazlığının bir hissəsi ötən ildən qalan ehtiyatlar və idxal hesabına kompensasiya edilə bilər.

Çexiyada quraqlıq yaz aylarından davam edir. Məlumatlara görə, mart və aprel ayları 1961-ci ildən bəri ən quraq dövrlərdən biri olub. Mütəxəssislər su ehtiyatlarının bərpası üçün bir neçə həftə ərzində gündəlik 10–30 millimetr səviyyəsində mülayim yağıntıların lazım olduğunu bildirirlər.