Azərbaycan Respublikasının Gənclər və İdman Nazirliyi tərəfindən gənclər təşkilatlarının fəaliyyətlərinin dəstəklənməsi məqsədi ilə 2024-cü il üzrə elan edilmiş qrant müsabiqəsi çərçivəsinədə “Yurd” Gənclərin İntellektual İnkişafına Dəstək İctimai Birliyi tərəfindən icra olunan “Şəhərdən kəndə-səyyar intellekt marafonu” layihəsinin icrasına başlanılıb.

Quba rayonunun 8 müxtəlif kənd və qəsəbə zonasında yeniyetmə və gənclərin iştirakı ilə intellektual oyunların keçirilməsini nəzərdə tutan layihənin ilk tədbiri Quba rayonu Məckə-Xacə kənd tam orta məktəbində təşkil edilib. Yarışda Quba rayonunun Təngəaltı, Çiçi, Səbətlər, Afurca, Püstəqsım, Rustov, Məckə-Xacə və Qam-qam kəndlərində yaşayan və təhsil alan yeniyetmə və gənclər iştirak edib.

Azərbaycan coğrafiyasının, flora və faunasının, tarixinin, ədəbiyyatının, mədəniyyət və incəsənətinin, tarixi şəxsiyyətlərinin, mədəniyyət və incəsənət xadimlərinin intellektual oyunlar vasitəsilə təbliğ edilməsi məqsədilə təşkil olunan seçim turunun yekununda Rustov kəndini təmsil edən “Zəfər” komandası birinci, Çiçi kəndini təmsil edən “Qartallar” komandası ikinci, Məckə-Xacə kəndinin təmsilçisi olan “Odlar Yurdu” komandası isə üçüncü yeri tutub. Yarışın əsasnaməsinə uyğun olaraq ilk iki yeri tutan komandalar final mərhələsində iştirak etmək haqqı qazanıb. Yekunda qalib və mükafatçılar diplom, medal və kubokla təltif olunublar.

Qeyd edək ki, layihə çərçivəsində növbəti turnir Quba rayonu Dağlı kənd tam orta məktəbində keçiriləcəkdir.