Azərbaycan Respublikasının Gənclər və İdman Nazirliyi tərəfindən gənclər təşkilatlarının fəaliyyətlərinin dəstəklənməsi məqsədi ilə 2024-cü il üzrə elan edilmiş qrant müsabiqəsi çərçivəsinədə “Yurd” Gənclərin İntellektual İnkişafına Dəstək İctimai Birliyi tərəfindən icra olunan “Şəhərdən kəndə-səyyar intellekt marafonu” layihəsi çərçivəsində növbəti tədbir keçirilib.

QHT.az xəbər verir ki, Quba rayonunun 8 müxtəlif kənd və qəsəbə zonasında yeniyetmə və gənlərin iştirakı ilə intellektual oyunların keçirilməsini nəzərdə tutan layihənin tədbiri Quba rayonu Vəlvələ kənd tam orta məktəbində təşkil edilib. Yarışda Quba rayonunun Vəlvələ, Paşaoba, Bərqov, Asparasti, Zərqava, Mirzəqışlaq, İsnovqışlaq və Xaroşa kəndlərində yaşayan və təhsil alan yeniyetmə və gənclər iştirak edib.

Rəsmi açılış mərasimində çıxış edən layihə rəhbəri, “Yurd” Gənclərin İntellektual İnkişafına Dəstək İctimai Birliyinin sədri Ramin Mahmudov qeyd edib ki, yarışın keçirilməsində əsas məqsəd Azərbaycan coğrafiyasının, flora və faunasının, tarixinin, ədəbiyyatının, mədəniyyət və incəsənətinin, tarixi şəxsiyyətlərinin, mədəniyyət və incəsənət xadimlərinin təbliğ edilməsi, eyni zamanda gənclərin intellektual oyunlar vasitəsilə bilik və bacarıqlarının artırılmasının və asudə vaxtının səmərəli təşkil edilməsinin təmin olunmasıdır.

Tədbirdə çıxış edən Quba rayon Vəlvələ kənd Çingiz Mursalov adına tam orta məktəbin direktoru İsmayıl Fərzəliyev bu yarışın yeniyetmə və gənclərin vətənpərvərlik tərbiyəsinin yükəldilməsində, Vətənimizin təbliğində böyük əhəmiyyəti olduğunu qeyd edərək təşkilatçılara belə tədbirlərin təşkil edilməsinə görə minnətdarlığını bildirib.

Seçim turunun yekununda İsnovqışlaq kəndini təmsil edən “Zirvə” komandası birinci, Mirzəqışlaq kəndini təmsil edən “Zəka” komandası ikinci, Bərqov kəndinin “Qarabağ” adlı komandası isə üçüncü yeri tutub. Yarışın əsasnaməsinə uyğun olaraq ilk iki yeri tutan komandalar final mərhələsində iştirak etmək haqqı qazanıb. Yekunda qalib və mükafatçılar diplom, medal və kubokla təltif olunublar.

Layihə çərçivəsində növbəti turnir Quba rayonu Zərdabi qəsəbəsində keçiriləcəkdir.