Pandemiya və sonrakı dövrdə neçə-neçə dost-tanışı, Azərbaycan futbolunda xitmətləri olmuş insanlar bizləri tərk edirlər.

Gənc, orta nəsil nümayəndələri arasında Masallı futbol məktəbinin yetirməsi Qəhrəman Əliyev əsasən baş məşqçi kimi tanınır. Bu dönəmə kimi isə əziyyətli yol qət edərək layiqli futbolçu karyerasına məxsusdur.

Ötən əsrin 70-80-ci illərində, futbolçu kimi gənc yaşlarından diqqəti cəlb edib, davamlı olaraq SSRİ çempionatının müxtəlif liqalarında çıxış edib. "Gənclik", "Avtomobilçi" Bakı/Mingəçevir, SKA Xabarovsk və "Neftçi"nin heyətində güclülər dəstəsi...

Futbolçu karyerasını bitirdikdən sonra doğma diyara dönüb, uzun illər "Viləş" Masallı komandasının sükanı arxasında olub. Müxtəlif illərdə çalışdırdığı komandaları avrokuboklara daşıyıb, Azərbaycan çempionu adını qazanıb.

"Şəmkir"in ölkə futbolunda liderlik dövrü, "Xəzər Lənkəran", MOİK, "Olimpik", "Masallı", "Bakı" klublarında fəaliyyət göstərib, yeniyetmə, gənc futbolçuların yetişməsində əmək sərf edib.

Qəhrəman Əliyev sakit təbiətli, xoş xasiyyətli, gülərüz, yüksək davranış səviyyəsi, mədəniyyəti ilə seçilirdi. Oyunlarda qalmaqallardan uzaq olardı. Hər kəsi başa düşməyə çalışar, bütün zamanlarda vəziyyətdən asılı olmayaraq barışdırıcı mövqe tutardı.

Qəhrəman müəllim haqqında keçmiş zamanda danışmaq ağırdı. Azərbaycan futbolu uzun, amansız xəstəlikdən sonra daha bir layiqli nümayəndəsini itirdi. Meydanlarda daima mübarizə apardığı kimi, sağlamlığı uğrunda da sona kimi döyüşdü...

Qəhrəman Əliyev Azərbaycan futbolu tarixində, ürəklərdə usta futbolçu, layiqli məşqçi, gözəl insan kimi qalacaq, yaddaşlardan heç zaman silinməyəcək...

Ruhun şad olsun, dəyərli insan!

ALLAH RƏHMƏT ELƏSİN.
Tahir Süleymanov
Beynəlxalq dərəcəli hakim,
"Neftçi"nin keçmiş vitse-prezidenti