Finlandiya hökuməti bu ilin oktyabrın 1-dən Finlandiya vətəndaşlığını almaq üçün tələb olunan ölkədə yaşama müddətini 8 ilə qədər artırmağı planlaşdırır. Bu barədə RİA Novosti hökumətin saytında dərc edilmiş bəyanata istinadən xəbər verir.

Sənəddə deyilir: “Fin vətəndaşlığını almaq üçün tələb olunan yaşayış müddəti cari beş ildən oktyabrın 1-dən səkkiz ilədək artırılacaq”.

Qeyd edilir ki, bu şərt immiqrantlara Finlandiya cəmiyyətinə daha yaxşı inteqrasiya etməklə yanaşı, təhlükəsizlik məsələlərini daha effektiv həll etməyə imkan verəcək. Yalnız yaşayış icazəsi ilə Finlandiyada sərf olunan vaxtın nəzərə alınacağı vurğulanır.

Respublika Prezidenti qərarı iyulun 5-də təsdiq etməli olacaq. Plana əsasən, islahat üç qanunvericilik layihəsi vasitəsilə mərhələli şəkildə həyata keçiriləcək.

Qərar artıq ictimaiyyət arasında müzakirələrə səbəb olub. Təşəbbüsün əleyhdarları hesab edirlər ki, vətəndaşlıq almaq üçün yaşayış müddətinin artırılması artıq ölkədə olan və cəmiyyətin tamhüquqlu üzvü olmağa çalışan immiqrantlar üçün əlavə maneələr yarada bilər.