Birləşmiş Ərəb Əmirlikləri xarici ticarət naziri Tani bin Əhməd Əl Zeyudi bildirib ki, heç bir tərəf Hörmüz boğazı üzərində dominantlıq qurmamalı və onu dünya iqtisadiyyatına qarşı təzyiq vasitəsi kimi istifadə etməməlidir.

Nazir bu fikirləri GLOBSEC 2026 çərçivəsində Praqa şəhərində keçirilən “İranla münaqişənin dünya iqtisadiyyatı və siyasətinə təsiri” adlı paneldə səsləndirib.

Əl Zeyudi vurğulayıb ki, Hörmüz boğazı beynəlxalq ticarət və enerji daşımaları üçün həyati əhəmiyyət daşıyan açıq beynəlxalq su yolu olaraq qalmalıdır.

“Hörmüz boğazı beynəlxalq gəmiçilik üçün açıq və əlçatan qalmalıdır. Heç bir tərəf onu nəzarətə götürməməli və qlobal iqtisadiyyata qarşı silah kimi istifadə etməməlidir”, – deyə nazir bildirib.

Onun sözlərinə görə, regional gərginliyin təsirlərini azaltmaq üçün BƏƏ artıq alternativ ticarət marşrutlarının yaradılması və logistika infrastrukturunun sürətli modernləşdirilməsi istiqamətində addımlar atır.

Nazir qeyd edib ki, bölgədə vəziyyətin gərginləşməsi və xüsusilə Fars körfəzi ətrafında ticarət yollarına təhdidlərin artması fonunda ölkə təchizat zəncirlərinin şaxələndirilməsi planını aktivləşdirib.

Əl Zeyudi bildirib ki, BƏƏ Hörmüz boğazından yan keçməyə imkan verən alternativ ticarət dəhlizlərini işə salır və bununla da təchizat sabitliyini qorumağa çalışır.
Bundan əlavə, biznesin, xüsusilə kiçik və orta sahibkarlığın dayanıqlığını təmin etmək məqsədilə 1 milyard dirhəm həcmində iqtisadi dəstək paketi hazırlanıb.

Nazir vurğulayıb ki, əvvəlcə onillik dövr üçün nəzərdə tutulan logistika transformasiyası geosiyasi vəziyyətə görə daha sürətlə həyata keçirilir.

O, həmçinin BƏƏ-nin beynəlxalq ticarətin genişləndirilməsi istiqamətində uzunmüddətli siyasətini davam etdirdiyini bildirib. Hərtərəfli iqtisadi tərəfdaşlıq sazişləri proqramının ölkənin xarici iqtisadi strategiyasında əsas alətlərdən biri olduğu qeyd edilib.

Nazirin sözlərinə görə, BƏƏ altı qitədə 35 ticarət sazişi imzalayıb, ölkənin qeyri-neft xarici ticarət dövriyyəsi isə 2025-ci ildə 1,03 trilyon dollara çataraq onu dünyanın əsas ticarət mərkəzlərindən birinə çevirib.