İsrail Hərbi Hava Qüvvələri Yəmənin paytaxtı Sanaa şəhərində strateji obyektləri hədəf alıb. Hücum, İran dəstəkli Husi üsyançılarının 2023-cü ildən bəri ilk klaster bombasını atmasından bir neçə gün sonra baş verib.

Baş nazir Benjamin Netanyahu açıqlayıb ki, hava hücumları prezident sarayı, şəhərin elektrik stansiyası və yanacaq anbarlarını əhatə edib. O bildirib: “Kim bizə hücum edirsə – biz cavab veririk. Kim hücum planlayırsa – biz qarşılıq veririk.”

Müdafiə naziri Israel Katz bildirib ki, İsrail Hərbi Hava və Dəniz Qüvvələri Husi terrorizmini dəstəkləyən infrastruktur obyektlərini vurmağa davam edir. O əlavə edib: “Hər raket atışı onlar üçün artıqlaması ilə geri ödəniləcək. Bu gün Husilərə qaranlıq, sonra isə daha ağır nəticələr gətirdik.”

Husi rəhbərliyi İsrail zərbələrinin Sanaa şəhərinin müxtəlif bölgələrinə endiyini bildirir. Yəmənin Husi idarəçiliyi altında olan Səhiyyə Nazirliyi qeyd edib ki, bir neft şirkətinə edilən hücumda 2 nəfər həlak olub, 35 nəfər yaralanıb. Sosial mediada yayılan görüntülərdə böyük yanğın və qara tüstü müşahidə olunub.

İsrail ordusu Asar və Hicaz elektrik stansiyalarını hədəf aldığını bildirib və bunları “hərbi fəaliyyət üçün mühüm enerji təminat obyektləri” kimi qiymətləndirib.

Husi üsyançıları İsrailə hücumları Qəzzadakı Fələstinlilərə dəstək olaraq həyata keçirirlər.