08 noyabr 2021-ci il tarixdə Masallı şəhər “Qəhrəmanlar Parkı, Şəhidlər abidə kompleksi”-nin önündə “Zəfər günü”nə həsr olunmuş möhtəşəm konsert proqramı təqdim olundu.

İlk öncə Azərbaycanın ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad edildi.

Sonra konsert proqramı açıq elan olundu.

Tədbirdə Respublikanın əməkdar artisti Səidə Şərifəliyeva, tanınmış ifaçı Rövşən Əziz, “Azərbaycanın səsi” yarışmasının qaliblərindən  Nəzakət Veysəlova, “Xalq ulduzu” yarışmasının qaliblərindən Xəyalə Qafarzadə, Masallı rayon Mədəniyyət Mərkəzinin solistləri  Atamoğlan Zahid, Miriş Hüseynov, Şamo İbayev və Vətən Müharibəsi qazisi tamaşaçılara vətənpərvərlik mövzularında musiqi nömrələri təqdim etdilər. Eyni zamanda Şəhid övladlarının ifasında "Zəfər günü"nə həsr olunmuş şerlər, "Halay" folklor qrupunun, Gündüz Babayevin quruluşu və iştirakı ilə Qarabağ Ritm Qrupunun rəqsləri konsertə xüsusi rəng qatdı.

Konsert proqramında Azərbaycan televiziya rejissoru və aktyoru Elçin Məmiyev çıxış edərək Azərbaycan ordusunun qəhrəmanlığından və “Beşatılan” filmindən bəhs etdi.

Tədbirdə Ulu öndərin işğal altında olan torpaqların bir gün mütləq azad olacağı barədə tarixi çıxışı və Müzəffər Ali Baş Komandan İlham Əliyevin azad olunmuş ərazilərin adlarını qürurla elan etməsini əks etdirən videoçarx nümayiş olundu.

Konsert proqramı atəşfəşanlıqla yekunlaşdı.