Rusiya və Hindistan miqrasiya və mobillik sahəsində əməkdaşlıq memorandumu imzalaya bilər. RİA Novosti xəbər verir ki, bu barədə Hindistanın Moskvadakı səfiri Vinay Kumar “International Life” jurnalı üçün məqaləsində yazıb.

"Hindistan və Rusiya arasında demoqrafik dinamika qarşılıqlı fayda üçün unikal imkan yaradır", - diplomat bildirib.

O, sazişin bağlanmasının məqsədini Rusiyanın Hindistandan ixtisaslı mütəxəssisləri cəlb etməsini asanlaşdırmaq və Rusiya Federasiyasının kadr problemlərini həll etmək adlandırıb.

Bundan əvvəl Moskva və Nyu-Dehlinin 2025-ci il üçün rəsmi nümayəndələrin mübadilə səfərləri cədvəlini planlaşdırdığı bildirilirdi.

Yanvar ayında Rusiya Prezidenti Vladimir Putin Rusiya Federasiyası ilə Hindistan arasındakı münasibətləri xüsusilə imtiyazlı strateji tərəfdaşlıq adlandırmışdı. Putin deyib ki, iki ölkə arasında əməkdaşlığın möhkəmləndirilməsi “dost xalqlarımızın fundamental maraqlarına cavab verir”.