Prezident İlham Əliyevin ABŞ-a səfəri Azərbaycan diplomatiyasının son illərdəki ən mühüm hadisələrindən biri kimi tarixə düşdü. Bu səfər təkcə ikitərəfli münasibətlərin rəsmi mərhələsi deyil, həm də ölkəmizin beynəlxalq nüfuzunun, geosiyasi çəkisinin və strateji tərəfdaşlıq imkanlarının genişlənməsi baxımından dönüş nöqtəsi oldu. Ağ Evdə keçirilən görüşlər, mətbuat konfransları və müxtəlif səviyyəli danışıqlar Azərbaycanın müstəqillik tarixi boyu ABŞ ilə münasibətlərində yeni bir mərhələnin başlandığını göstərdi. Bu səfərdə əldə olunan razılaşmalar və verilən mesajlar həm siyasi, həm iqtisadi, həm də təhlükəsizlik müstəvisində dərin təsir göstərəcək hadisələrin başlanğıcı kimi qiymətləndirilir.
Azərbaycan uzun illərdir ki, regional sabitlik, enerji təhlükəsizliyi və beynəlxalq iqtisadi əməkdaşlıq sahələrində mühüm rol oynayır. ABŞ ilə münasibətlərin strateji tərəfdaşlıq səviyyəsinə yüksəlməsi, əslində, bu reallığın beynəlxalq miqyasda qəbul olunmasının göstəricisidir. Prezident İlham Əliyev səfər çərçivəsində həm mətbuata, həm də müxtəlif dövlət və hökumət nümayəndələrinə verdiyi açıqlamalarda bu əməkdaşlığın əsas istiqamətlərini və gələcək perspektivlərini aydın şəkildə ortaya qoydu. Əsas vurğulardan biri, yeni imzalanacaq sənədlərin və əməkdaşlıq müqavilələrinin Azərbaycanın iqtisadiyyatını daha da şaxələndirəcək, işsizliyi azaldacaq və yeni investisiya imkanları yaradacaq potensiala malik olmasıdır.
Bu səfərin tarixi əhəmiyyətini göstərən mühüm faktlardan biri də ABŞ-ın Azərbaycanı Cənubi Qafqaz regionunda etibarlı tərəfdaş və regional sabitliyin təminatçısı kimi tanımasıdır. Son illərdə regionda baş verən geosiyasi dəyişikliklər, sülh prosesində əldə olunan uğurlar və xüsusən də Ermənistanla münasibətlərdə yeni mərhələyə keçid Azərbaycanın beynəlxalq mövqeyini gücləndirdi. İlham Əliyevin səfəri zamanı verdiyi bəyanatlar ABŞ-ın bu proseslərdə Azərbaycana dəstəyinin davamlı olacağını göstərdi.
1992-ci ildən bəri Azərbaycana qarşı tətbiq olunan bəzi məhdudiyyətlərin ləğvi isə bu səfərin konkret nəticələrindən biri kimi diqqət çəkir. Bu qərar Azərbaycanın beynəlxalq iqtisadi əlaqələrində yeni imkanların açılması, texnologiya transferi, ticarət həcminin artması və ikitərəfli layihələrin sürətləndirilməsi deməkdir. Bütün bu hadisələr fonunda İlham Əliyevin xarici siyasəti özünün strateji xəttini bir daha nümayiş etdirdi. Bu siyasət, bir tərəfdən, Azərbaycanın regional lider mövqeyini möhkəmləndirir, digər tərəfdən, onu qlobal arenada etibarlı tərəfdaş və müzakirələrdə söz sahibi olan ölkə kimi tanıdır. İlham Əliyevin xarici siyasəti çoxvektorlu, çevik və milli maraqlar üzərində qurulub.