Bakı, 26 avqust — Azadmedia.az


Avqustun 22-də Türkmənbaşı şəhərində Azərbaycan Respublikasının Prezidenti İlham Əliyevin, Türkmənistan Xalq Məsləhətinin sədri Qurbanqulu Berdiməhəmmədovun və Özbəkistan Respublikasının Prezidenti Şavkat Mirziyoyevin iştirakı ilə sənədlərin imzalanması mərasimi olub.
Cənubi Qafqaz və Mərkəzi Asiya regionunda yerləşən Azərbaycan Respublikası, Türkmənistan Respublikası və Özbəkistan Respublikası arasında son illər müşahidə edilən siyasi dialoq, iqtisadi inteqrasiya təşəbbüsləri və mədəni-humanitar əlaqələr bu baxımdan xüsusi əhəmiyyət daşıyır. 2025-ci il 22 avqust tarixində Türkmənistanın Avaza şəhərində Azərbaycan Prezidenti cənab İlham Əliyevin iştirakı ilə keçirilən yüksək səviyyəli görüşün yekunlarına dair bəyanat bu əməkdaşlıq formatının strateji xarakterini bir daha təsdiqləmişdir.
Bəyanatda irəli sürülən əsas tezislər – Türkmənistanın etibarlı inkişaf yolunda olması, Azərbaycan və Türkmənistan arasında mövqelərin üst-üstə düşməsi, türkmən xalqının Qarabağda məscid inşa etməsi təşəbbüsü, Özbəkistanın Xankəndidə tikiş fabriki və Füzulidə məktəb kimi infrastruktur layihələri ilə çıxış etməsi – üçtərəfli münasibətlərin yalnız siyasi və diplomatik müstəvidə deyil, həm də sosial-iqtisadi və mədəni səviyyədə möhkəmləndiyini göstərir.
Azərbaycan və Türkmənistan xalqlarını tarixi, mədəni və dini dəyərlər birləşdirir. Prezident cənab İlham Əliyevin bəyanatında qeyd olunduğu kimi, iki ölkə xalqları əsrlər boyu bir ailə kimi yaşamış, bu gün isə müstəqil dövlətlər kimi həmin ənənələri davam etdirirlər.
Bundan əlavə isə, Azərbaycan və Türkmənistan arasında əlaqələr qədim tarixi və mədəni köklərə əsaslanır. Hər iki xalq ortaq türk mənşəyinə, dilinə, dininə və adət-ənənələrinə görə bir-birinə yaxın olmuş, bu oxşarlıqlar müasir dövrdə də dövlətlərarası münasibətlərin möhkəmlənməsinə şərait yaratmışdır. İki ölkə arasında siyasi əməkdaşlıq yüksəksəviyyəli görüşlər, imzalanan sazişlər və beynəlxalq təşkilatlarda qarşılıqlı dəstək üzərində qurulmuşdur. Xəzər dənizinin hər iki ölkəyə verdiyi imkanlar enerji sahəsində əməkdaşlığı daha da vacib etmişdir. Bir sıra sahələr birgə fəaliyyət tərəfdaşlığın simvolu kimi çıxış etmişdir. Eyni zamanda nəqliyyat və logistika sahəsində əməkdaşlıq Orta Dəhliz layihəsi çərçivəsində önəmli yer tutur, Bakı–Türkmənbaşı dəniz xətti isə yük və sərnişin daşımalarında mühüm rol oynayır. Bu əməkdaşlıq yalnız iqtisadi və siyasi sahələrlə məhdudlaşmır, mədəniyyət, elm və humanitar sahələrdə də özünü göstərir. Hər iki ölkədə mədəniyyət günləri, sərgilər və elmi konfranslar təşkil edilir, təhsil və tələbə mübadiləsi proqramları həyata keçirilir, idman və gənclər təşkilatları arasında əməkdaşlıq genişlənir. Bütün bunlar göstərir ki, Azərbaycan–Türkmənistan münasibətləri strateji tərəfdaşlıq səviyyəsinə yüksəlmiş və həm ikitərəfli, həm də regional miqyasda mühüm əhəmiyyət kəsb edən əməkdaşlıq nümunəsinə çevrilmişdir.
Ümumən isə bu mövqeylər ölkələrin gələcəkdəki birgə formada keçiriləcək tədbirləri və əlaqələr sistemini daha da genişləndirməklə yanaşı bir sıra yeniliklər də gətirəcək. 22 avqust tarixində keçirilən bu görüşdə bu əlaqələrin daha da güclənməyinə şərait yaratmışdır.


Mehman Axundov - Masallı rayonu Ərkivan qəsəbə 1 nömrəli tam orta məktəbin müəllimi