Bir valideynin sadə bir sağlamlıq arayışı almaq təcrübəsi ölkəmizdə səhiyyə sisteminin nə qədər ağır və bürokratik işlədiyini bir daha ortaya qoyur. Jurnalist Ramilə Qurbanlının şəxsi təcrübəsi isə cəmiyyətin çoxsaylı insanlarının hər gün üzləşdiyi gerçəkliyin bariz nümunəsidir.

Uşaq üçün tibbi arayış almaq istəyən valideynin qarşısına qoyulan maneələr təsəvvür edilməzdir: üç poliklinika, iyirmiyə yaxın həkim, saysız kabinet, uzun növbələr və əsəbləri tarıma çəkən süründürməçilik. Ən pisi isə odur ki, bütün bu prosedurlar bir sənəd üçün tələb olunur.

Arayış almaq prosesi əslində insanlara xidmət etməli olduğu halda, əksinə, onların vaxtını, gücünü, səbrini və hətta sağlamlığını əlindən alır. Bir poliklinikadan digərinə göndərilmək, həkimlərin iş başında olmaması və ya məzuniyyətə çıxması, əvəzləyici mexanizmin olmaması — bütün bunlar “sistem” adı altında vətəndaşın üzərinə yüklənmiş əlavə əzabdır.

Bir vaxtlar sahə poliklinikasında 20 manata bir neçə dəqiqəyə verilən arayış indi günlərlə vaxt aparan, əsəbləri tükədən, insanı təhqir edən prosedurlarla əvəzlənib. Bu isə yalnız insanlara yox, həm də həkimlərin özlərinə ağır yükdür. Məlumdur ki, yaradılan bu mexanizm tibbi personalı da sıxışdırır, həkimlərdən çox zaman əlçatmaz şeylər tələb olunur və nəticədə onlar da gərginlikdən boğaza yığılır.

Ramilə Qurbanlı haqlı olaraq sual edir: “Bir sağlamlıq arayışına görə uşaqlı-böyüklü əsəb sistemimiz sıradan çıxacaqsa, üzrlü sayın, heç kimə lazım deyil o sistem.”

Əgər “vətəndaş məmnuniyyəti” devizi ilə təqdim olunan bu qaydalar əks nəticə doğurursa, deməli, sistem ya köklü şəkildə dəyişməli, ya da tamamilə ləğv olunmalıdır. İnsanların həyatını asanlaşdırmaq əvəzinə çətinləşdirən mexanizm “islahat” sayıla bilməz.

Səhiyyə idarəçiliyində hər bir yenilik insanların rahatlığına, sağlamlığına və vaxtına qənaət etməlidir. Əks halda, bu sistemin davamı mümkünsüzdür – nə vətəndaş, nə də həkim bu yükün altında daha çox qala bilməz.

Məqalə jurnalist Ramilə Qurbanlının sosial media hesabından götürülüb.