Kəmalə Aşumova,
"Ümidli Gələcək" Sosial Təşəbbüslər İctimai Birliyinin sədri və Uşaq Qaynar Xəttinin rəhbəri

2025-ci il Azərbaycanda Konstitusiya və Suverenlik İli elan olunub bu, müstəqilliyin, dövlətin inkişafının və insan ləyaqətinə hörmətin rəmzidir. Bu, sadəcə təqvim tarixi deyil. Bu il, müasir Azərbaycanın əsas prinsiplərini qanunun aliliyini, bərabərliyi, ədaləti və fəal vətəndaş iştirakını bir daha xatırladır.
20 oktyabr tarixində Qeyri-Hökumət Təşkilatlarına Dövlət Dəstəyi Agentliyinin təşkilatçıllığı ilə Xankəndidə Azərbaycan Qeyri-Hökumət Təşkilatlarının Əməkdaşlıq Forumu keçirildi. Bu mühüm tədbir ölkənin müxtəlif bölgələrindən ictimai sektor nümayəndələrini, ekspertləri və fəalları bir araya topladı. Forumun devizi “Konstitusiya və Suverenlik cəmiyyətin birliyi və inkişafının əsası” təcrübə mübadiləsi aparmaq, tərəfdaşlıqları möhkəmləndirmək və vətəndaş cəmiyyətinin inkişafı üçün yeni həll yolları tapmaq kimi ümumi məqsədi əks etdirirdi.
Forumun məhz Xankəndidə keçirilməsi isə xüsusi mənaya malikdir. Bu, Qarabağın dirçəlişinin, bölgəyə vətəndaş təşəbbüslərinin geri dönüşünün rəmzidir. Bir çox iştirakçılar, o cümlədən mənim üçün də bu, doğma evimizə, ağrı dolu keçmişin yerini ümid, inkişaf və yaradıcılığa verdiyi torpaqlara mənəvi qayıdış idi.
Forumla paralel olaraq, Azərbaycan Respublikasının İnsan Hüquqları üzrə Müvəkkilinin (Ombudsmanın) təşəbbüsü ilə 20 oktyabr – 20 noyabr tarixlərini əhatə edən Uşaq Hüquqları Ayi elan edilmişdir. Bu təşəbbüs BMT-nin Uşaq Hüquqları haqqında Konvensiyasının qəbul edilməsinin ildönümünə həsr olunub. Məhz bu müddət ərzində dövlətin, cəmiyyətin və ailələrin diqqəti uşaqların zorakılıqdan, ayrı-seçkilikdən və laqeydlikdən qorunmasına, onların təhsil, təhlükəsizlik və emosional rifah hüququna yönəlir.
Qadınların və uşaqların hüquqlarının müdafiəsi sahəsində çalışan təşkilatlar üçün bu, sadəcə maarifləndirici kampaniya deyil, praktiki təşəbbüslərin gücləndirilməsi, psixoloji dəstək, rəqəmsal təhlükəsizlik, hüquqi savadlılıq və ailə maarifləndirilməsi sahələrində real imkandır.
QHT Forumu və Uşaq Hüquqları Ayi bir fəlsəfədə birləşir — mərkəzdə insan və onun hüquqları dayanır. Azərbaycanın Konstitusiyası bu prinsipləri təsbit edir, uşaqlara qayğı isə bu prinsipləri real həyatda həyata keçirir.
Bu gün Azərbaycan azad edilmiş əraziləri bərpa edir, Qarabağda yeni sosial münasibətlər qurur. Məhz bu mərhələdə insan hüquqları, xüsusən də uşaq hüquqları anlayışı daha böyük əhəmiyyət kəsb edir. Xankəndi Forumunda və Uşaq Hüquqları Ayı çərçivəsində keçirilən tədbirlər qanun, sülh və humanizm üzərində inamla gələcəyini quran Azərbaycanı yeni ruhunu əks etdirir.
Bizim təşkilat üçün Forumda iştirak təkcə böyük bir şərəf deyil, həm də sosial proqramlara yeni yanaşmaların yaradılmasına, tərəfdaşlıqların möhkəmləndirilməsinə və uğurlu təcrübənin paylaşılmasına praktik töhfə vermək imkanıdır. Biz inanırıq ki, yalnız QHT-lərin, dövlət qurumlarının və cəmiyyətin birgə səyləri nəticəsində uşaqların və qadınların hüquqlarının qorunması sahəsində dayanıqlı və real nəticələr əldə etmək mümkündür.
Konstitusiya. Suverenlik. Uşaq Hüquqları. Bu üç dəyər Azərbaycanın sülhə, ədalətə və inkişafa aparan yolunu müəyyən edir.