Quba rayonu Qımılqışlaq kənd tam orta məktəbində təşkil olunan yarışda Quba rayonunun Qımılqışlaq, Hacıhüseynli, Əliməmməoba, Hacıqayıb, Davudoba, Küpçalqışlaq, Çiçi kəndlərindən və Gənclər qəsəbəsindən olan 48 nəfər şagird və müəllimlərdən ibarət 8 komanda tərkibində mübarizə aparıb.

“Yurd” Gənclərin İntellektual İnkişafına Dəstək İctimai Birliyindən verilən məlumata görə, tədbirin açılış mərasimində çıxış edən layihə rəhbəri, Birliyinin sədri Ramin Mahmudov yarışın keçirilməsində əsas məqsədin 125 illik yubileyi olan Azərbaycan kinosunun gənc nəsil arasında təbliğ edilməsi, eyni zamanda gənclərin intellektual oyunlar vasitəsilə bilik və bacarıqlarının artırılmasının və asudə vaxtının səmərəli təşkil edilməsinin təmin olunmasıdır.

Bir dövrəli dairəvi sistem üzrə keçirilən turnirdə qalib adını Küpçalqışlaq kəndinin təmsil edən “Küpçal” komandası qazanıb və final mərhələsində iştirak etmək hüququ əldə edib. Qımılqışlaq kəndini və Gənclər qəsəbəsini təmsil edən eyniadlı komandalar yarışda müvafiq olaraq ikinci və üçüncü yerləri tutublar. Qalib və mükafatçılar müvafiq olaraq kubok, medal, diplom və bədii ədəbiyyat nümunəli kitablarla təltif edilib.

Qeyd edək ki, Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə Birlik tərəfindən icra olunan “25-ci kadr-KinoMƏNlərin intellekt savaşı” adlı layihə çərçivəsində bu günədək Siyəzən, Şabran, Xaçmaz və Qusar rayonlarında intellektual turnirlər keçirilib.