“Kliniki Tibbi Mərkəzlə (“Semaşko”) bağlı sosial şəbəkələrdə yayılan fikirlər və videomateriallarla bağlı bildiririk ki, xəstəxanada mövcud vəziyyət və çatışmazlıqlar barədə TƏBİB məlumatlıdır və bu çatışmazlıqların aradan qaldırılması istiqamətində fasiləsiz işlər görülür”.

Bu barədə TƏBİB-dən verilən məlumatda deyilir:

“Sosial şəbəkələrdə yayılan videomaterialla bağlı qeyd edək ki, pasiyetin “Çin dərmanı” adlandırdığı dərman preparatı “Favipiravir”dir. “Favipiravir” müxtəlif növ RNT-virusları, o cümlədən, koronovirus SARS-CoV-2 əleyhinə dərman vasitəsi kimi istifadə olunan kimyəvi tərkibdir.

Dərman vasitəsi ilk dəfə qrip əleyhinə müalicə vasitəsi kimi Yaponiyada istehsal olunub və qripdən əlavə, ağır viruslu infeksiyaların müalicəsi üçün təsdiqlənib. Yaponiyada “Favipiravir” tərkibli dərman vasitəsinin ticarət adı “Aviqan”dır.

“Favipiravir”in koronavirus aleyhinə effektivliyi 2020-ci ilin mart ayında Çinin Uhan və Şençjen şəhərlərində aparılmış kliniki tədqiqatlar nəticəsində sübut olunub. Müayinənin nəticələri göstərib ki, “Favipiravir”in təsiri altında koronovirusun insan orqanizmində mövcudluğu 11 gündən dörd günə qədər azalır və 91% xəstələrin virusla zədələnmiş ağciyərlərində vəziyyətin yaxşılaşması müşahidə olunur.

Halbuki “Favipiravir”i qəbul etməyən kontrol qrupda vəziyyəti yaxşılaşan xəstələrin sayı 62% təşkil edib. “Favipiravir” preparatının özəlliyi ondan ibarətdir ki, onun təsirinə dözən virus hələlik aşkarlanmayıb. Həmin dərman vasitəsi pandemiya boyunca öz effektivliyini saxlamaqdadır.

Hazırda bütün dünya üzrə həmin dərman vasitəsi ilə bağlı geniş kliniki tədqiqatlar aparılır. O cümlədən, qeyd edək ki, ölkəmizdə mövcud olan xüsusi rejimli xəstəxanalar dünyada COVID-19 infeksiyasının müalicəsində istifadə edilən bütün dərman preparatları ilə təmin edilib.

Digər preparat olan “Paracetamol” – qızdırmasalıcı və ağrıkəsici effektə malik olan dərman vasitəsidir. Dərman vasitəsini müxtəlif növ ağrıların ( baş, diş, nevralgiya, əzələ, revmatik, menstrual, yanıq zamanı olan, travmalarda müşahidə olan ağrıların və s.) aradan qaldırılması üçün, eləcə də iltihablı proseslərdə müşahidə olunan qızdırma və hərarəti salmaq üçün istifadə edilir.

Digər iddiaya görə, həkim-infeksionistlərlərin çatışmazlığı müşahidə edilir və digər ixtisasdan olan həkimlərin pasiyentlərə qulluq göstərməsindən narazılıq edilir. Qeyd edək ki, bütün dünyada koronavirus pandemiyasına qarşı mübarizəyə tək həkim-infeksionistlər deyil, müxtəlif ixtisaslı həkimlər cəlb edilib.

Eləcə də, Azərbaycanda bütün ixtisasdan olan həkimlər ayrı-ayrı pandemiya xəstəxanalarında pasiyentlərə xidmət göstərir. Lakin bu o demək deyil ki, xüsusi rejimli xəstəxanalarda müalicələr özbaşına və heç bir əsası olmadan aparılır.

Bütün tibb müəssisələrində müalicə TƏBİB tərəfindən tərtib olunmuş “COVID-19 - Tibb işçiləri üçün müvəqqəti rəhbərlik” əsasında müvafiq protokollarla aparılır. Eyni zamanda, hər bir xəstəxana həkim-infeksionist tərəfindən koordinasiya olunur.

Bir daha bildiririk ki, Kliniki Tibbi Mərkəzlə bağlı araşdırma davam etdirilir və pasiyentlərin müraciətləri və şikayətləri nəzərə alınaraq, tez bir zamanda mövcud çatışmazlıqlar aradan qaldırılacaq”.