- Aqil Acalov kimdir?

- Aqil Acalov millətini, xalqını, vətənini, bayrağını sevən vətəndaşdır. A. Acalov Acalovlar şəcərəsinin soyadı ilə fəxr edən bir nümayəndəsidir.
Şəcərəmdə onlarla insanı misal göstərmək olar ki, Azərbaycan, Türk dünyası üçün, islamçılıq üçün həyatlarını həsr etmişlər. Soy köküm Qarapapaq türklərindən gəlir. Ata tərəfdən Osmanlı imperiyası çökdükdən sonra bəzi mənbələrdə Cənub-Qərbi Qafqaz Türk Cümhuriyyəti kimi bilinən türk dünyasında ilk Qarapapaq türk cümhuriyyəti quran və dövlət başçısı olan Emin bəy Acalovun törəməsiyəm. Ana tərəfdən isə İsrafil bəy Acalov Borçalı bəylərindən olub. Ermənilər ona intelligent cəllad deyirdilər. Çünki on minə yaxın erməni terrorçusunu məhv edib və 31 mart Soyqırmının qisasını alan insan olub. Nəslimizdən generallar Səfərəli bəy Acalov, Vəli bəy Acalovu misal göstərə bilərəm. Səfərəli bəy Acalov Bakıda 15 sentyabrda bir gecədə daşnak partiyasının bütün üzvlərini məhv edən insan olub.

Mən qürur duyuram ki, onların hər birinin fəaliyyətlərinin əsası dövlətçilik, millətçilik olub. Mən də bu gün babalarımın yolunu müasir dövrün qaydalarına uyğun davam etdirməyə çalışıram.
Ziyalı ailədə dünyaya göz açmışam. Atam keçmiş dövlət məmurudur, anam müəllimə olub. Ümumilikdə nəslimizdə elm xadimləri çoxdur.

- İdman,siyasət və iqtisadiyyat- bunlardan hansı Aqil Acalova daha çox yaxındır?

- İdman mənim həyatımın ayrılmaz hissəsidir. Bir zamanlar professional idmanla məşğul olmuşam, bu gün də idman fəalliyyətimi peşəkar olmasa da, davam etdirirəm və bacardığım qədər idmançılara dəstək olmağa çalışıram. Əvvəllər siyasətlə məşğul olmuşam. Azərbaycan-Gürcüstan Gənclər Təşkilatının, Dünya Azərbaycanlıları Konqresi Gənclər Təşkilatının sədri olmuşam. Düşünürəm ki, fəalliyyətimdə əsas uğurum 2013-cü ildə Gələcəyə Baxış İctimai Hərəkatını təsis etmək və onun həmsədri olmaq olub. Ancaq o sadəcə bir layihə idi.
Daha çox ictimai və idman sahəsində fəaliyyət göstərdim. İctimai sahə mənim ruhuma daha yaxın sahədir. Vətənini sevən hər bir Azərbaycan gənci fəal olmalı və ölkədə baş verən hadisələrə biganə qalmamalıdır. Mən çalışdım ki, uzun illər formalaşan “idmançılar savadsızdırlar, onlar oxumur, ictimai- siyasi-sosial sahələrdə aktiv deyillər” kimi streotipləri sındırım və göstərim ki, idmançılar da savadlı olurlar. Sadəcə cığır açmaq lazımdır ki, onlar da aktivləşsinlər. Bizim ailədə təhsilə böyük önəm verirlər. Valideynlərimiz həmişə bizi diqqətdə saxlayıblar ki, yaxşı oxuyaq. Mən daha çox iqtisadiyyata meyilli olduğum üçün iqtisadiyyat sahəsində fəaliyyətə başladım. Bakalavr və magistratura, sonra isə doktoranturanı bitirib elmi dərəcə aldım.

- Dünyada baş verən inflyasiyaya Aqil Acalovun münasibəti?

- İqtisadiyyat elə bir sahədir ki, onu dərindən biləndə və ondan düzgün istifadə edəndə yeni dividentlər əldə etmək olar. Baxış bucağını və fəaliyyət planını düzgün qurmaq lazımdır. Əgər bu gün dünyada inflyasiya baş verirsə, bu heç də qorxunc hal deyil. Bu, yeni imkanların qazanılmasına səbəb olan tumurcuqlardır. Sadəcə bundan yararlanıb, inkişaf etdirmək lazımdır. Mənim üçün inflyasiya normal bir prosesdir. Buna bir çox amilləri misal göstərə bilərəm. Müharibələr, pandemiya və s. Sadəcə inflyasiya baş verən müddətdə maksimum dərəcədə az ziyanla bu prosesdən çıxmaq lazımdır.

- Aqil Acalov özü ilə bağlı nələri oxucuları ilə bölüşəmək istəyərdi?

- Əgər bu sualda nəzərdə tutulan şəxsi həyatdırsa, şəxsi həyatımı heç kimlə paylaşmıram. Düşünürəm ki, şəxsi həyat gündəm və ya müzakirə mövzusu olmamalıdır. Bundan başqa hər hansı sahədə bütün fikirlərimi paylaşa bilərəm.

- İnsan keçmişinə baxanda indi özünü daha ağıllı hesab edir, hətta keçmişdəki özünə gülür. Buna səbəb nədir?

- İnsan elə bir varlıqdır ki, həmişə düşünür ki, mən düzəm, haqlıyam. Ancaq yaşa dolduqca görürsən ki, keçmişdəki düşüncə tərzin ilə indiki düşüncə tərzin arasında çox fərq var. Onda gülürsən ki, o zamanlarda necə də uşaq kimi fikirləşmişəm. Əsas odur ki, istənilən hadisədən, səhvindən və ya düzündən nəticə çıxarmağı bacarasan. Çünki həyat eyni səhvləri dəfələrlə təkrarlayacaq qədər uzun deyil.

- Hansı dəyərlərimizin aradan getməsi sizi məyus edir? Hazırda mentalitetimiz layiqincə qorunurmu?

- Bu suala cavab olaraq bəzi məsələlərə tənqidi yanaşacam, bəzi məqamları isə təqdir edəcəyəm. Bizi bu gün var edən, bizi gələcəyə aparan soy kökümüzdən gələn bizi biz edən milli-mənəvi dəyərlərimizdir. Əgər dəyərlərimizi itirsək, toplum olaraq məhv olarıq. Buna görə də mən hər zaman milli-mənəvi dəyərlərimizin qorunub saxlanmasının tərəfindəyəm. Hər bir xalqın özünəməxsus dəyərləri və ənənələri var. Biz elə bir coğrafiyanın insanlarıyıq ki, burda mədəniyyətlər qovuşur. Bəzən belə fikirlər səsləndirilir ki, mənəvi dəyərlərimiz ölüb, əxlaqi keyfiyyətlər azalıb. Razıyam, beləki televizyalarda insanların məhrəmi göz qarşısında nümayiş olunur, ailə -məişət problemləri gündəm olub, bu baxımdan insani keyfiyyətlər azalıb. Amma bu o demək deyil ki, biz pisik. Çünki bizim millətimiz qüdrətli millətdir, bizim soy kökümüz var. Düşmənlərimiz var və onlar çalışırlar ki, bizim toplumu məhv etsinlər. Amma Qarabağ müharibəsi göstərdi ki, bizi məhv etmək mümkün deyil. Millət olaraq biz təkcə coğrafi məkandan ibarət deyilik. Bizim milli-mənəvi dəyərlərimizi qoruyan gənclərimiz, xanımlarımız var.
Təəssüf ki, bəzi gənclərimiz inkişafı, müasir dünyaya inteqrasiyanı, davranış qaydalarını yanlış qavrayır. Müasirlik açıq- saçıq geyinmək deyil, insanın şüuru, təhsili müasir olmalıdır. İnsan hər şeyin ən gözəlini və kübar olanı örnək götürməli, ondan da gözəlini yaradıb, inkişaf etdirməlidir.

- Əgər qüdrətiniz olsaydı,nəyi qadağan edərdiniz və ya hansı yeni qanunu gətirərdiniz?
- Müharibələri, uşaqlara, qadınlara qarşı zorakılığı qadağan edərdim. Uşaqlar şiddət görməməli, ölməməlidir. Çünki uşaqlar gələcəyimizdir.

- Hazırda elə bir imkanınız olsaydı, idmanda nələri dəyişərdiniz, nə yeniliklər edərdiniz?

- Ümumiyyətlə, idmanın yaxşısı, pisi yoxdur. Əsas idmanla məşğul olmaqdır. Ona görə də idmanın bütün növlərini inkişaf etdirərdim. Mən Braziliya Ciu-citsu döyüş sənətinin inkişafı ilə bərabər qarışıq idman növlərinin inkişafı ilə də məşğulam. Qarapapaq idman klubunu yaratmışıq ki, başqa idman növlərinin inkişafına şərait yaradaraq, idmançıları beynəlxalq turnirlərə göndərək ki, qalib olsunlar, bayrağımızı dalğalandırsınlar.

- Gənclərə məsləhətiniz?

- Hansı sahənin insanı olursan ol, əsas odur ki, məqsədinə gedən yolda dürüst ol. Mən həyatda xəyanətə uğramışam, ancaq heç vaxt heç kimə xəyanət etməmişəm. Tövsiyəm odur ki, tutduqları yolda xəyanətkar olmasınlar, dürüst olsunlar, paylaşmağı bacarsınlar. İnsan uğur əldə etdikdə o uğuru başqa insanlarla paylaşmağı bacarmalıdır və insan başqa insanların uğuruna sevinməyi də bacarmalıdır. Hansı yolda olursan ol, o yolda şərəflə addımlamalısan. İnsan hər bir nəaliyyətini düzgün şəkildə əldə etməlidir. Bunu əldə etdikdən sonra özünü itirməməlidir, özünü sadəliklə tərbiyələndirməlidir. İnsan təmiz adla yaşamalı, vətənini, xalqını sevməlidir. Vətənini sevən insan əxlaqlı olur, dürüst və sadiq olur.