İsrail Prezidenti İsxaq Hersoqun Bakıya səfəri ilə bağlı Türkiyə mediasında diqqətçəkən iddia yayılıb.

AZTV-nin məlumatına əsasən, Türkiyə nəşrləri İsrail Prezidentinin oktyabrın 14-də AZAL-a məxsus sərnişin təyyarəsi ilə Türkiyənin hava məkanından keçərək Azərbaycana gəldiyini bildirir.

İddiaların diqqət mərkəzində AZAL-ın “Şuşa” adını daşıyan “Boeing 787-8 Dreamliner” təyyarəsi dayanır. Uçuş məlumatlarına görə, VP-BBR qeydiyyatlı bort oktyabrın 14-də Təl-Əviv–Bakı marşrutu üzrə uçuş həyata keçirib və saat 15:37-də Bakıya enib.

İsrail Prezidentinin qarşılanması ilə bağlı ilk aşkarlanan xəbərin saat 16:19-da yayılması isə əlavə suallar yaradıb. Təyyarənin enişi ilə xəbərin yayılması arasında cəmi 42 dəqiqə olub.

Hersoqun məhz həmin təyyarə ilə Bakıya gəlib-gəlmədiyi və Türkiyə hava məkanından hansı şərtlərlə keçdiyi barədə yayılan məlumatlar müzakirə doğurub.