Agentlik olaraq biz də Şəhid ailəsi və Qazilərin tibbi xidmətlərə əlçatanlığının təmin edilməsi məsələsinə həssaslıqla yanaşırıq. “YAŞAT” Fondu ilə əməkdaşlıq sayəsində Vətən müharibəsi iştirakçılarının tibbi xidmətlərlə bağlı müraciətləri tərəfimizdən operativ qaydada cavablandırılır. Fond tərəfindən Agentliyə yönləndirilən müraciətlə bağlı müvafiq tibb müəssisəsinə sorğu göndərilir. Nəticədə müharibə iştirakçısının ilkin müayinədən keçməsi icbari tibbi sığorta çərçivəsində təmin edilir. Ehtiyac olduqda Xidmətlər Zərfi çərçivəsində vətəndaşın müalicə və ya əməliyyat olunması qarşılanır.
"Bu ilin 9 ayı ərzində Vətən müharibəsi iştirakçısı və şəhid ailəsi üzvü olan 7 993 şəxsə 109 443 tibbi xidmət göstərilib".
Azadmedia.az xəbər verir ki, bunu İcbari Tibbi Sığorta üzrə Dövlət Agentliyinin sədri Zaur Əliyev Yaşat Fondunun bir illik fəaliyyətinə dair mətbuat konfransında çıxışı zamanı deyib. 
O qeyd edib ki icbari tibbi sığortanın Xidmətlər Zərfi çərçivəsində göstərilən tibbi xidmətlərin 95 687-si ambulator, 13 756-sı isə stasionar şəraitdə göstərilib: "Tibbi xidmət alan şəxslərdən 7 051 nəfəri müharibə iştirakçısı, 942 nəfəri isə şəhid ailəsi üzvü olub. Həmin dövr ərzində icbari tibbi sığortanın Xidmətlər Zərfi çərçivəsində 321 pasiyent üzərində 381 cərrahi əməliyyat icra olunub. Əməliyyatlar arasında cərrahi müdaxilədən sonrakı vəziyyətlər, hərbi əməliyyatlar zamanı partlayış və ya qəlpələrin səbəb olduğu zədələr çoxluq təşkil edib. Həmçinin Tibbi Reabilitasiya Xəstəxanasında 696 nəfərə reabilitasiya xidmətləri göstərilib".
Agentlik sədri əlavə edib ki, bu günədək 600-dən çox şəhid ailəsi üzvü, 1600-dən çox hərbçi və 300 terror qurbanına psixoloji yardım göstərilib və ehtiyac olduqda müalicə üçün həkim-psixiatrlara yönəldilib: "Müvafiq qurumlarla birgə 100-dən çox Vətən müharibəsi iştirakçısına Bakı şəhərində psixiatrik və psixoloji dəstəyin göstərilməsi təmin edilib. İcbari tibbi sığorta çərçivəsində Vətən müharibəsi iştirakçılarına göstərilən tibbi xidmətlər barədə Agentlik tərəfindən həyat hekayələri çəkilir. Onlar müharibə dövründən, keçdikləri döyüş yolundan və aldıqları tibbi xidmətlər sayəsində sağlamlıqlarına qovuşmalarından bəhs edirlər".