“Şəfa” Psixoloji-Sosial Yardım İctimai Birliyi “Müharibədən əziyyət çəkən qadınlara sosial-psixoloji dəstəyin göstərilməsi” layihəsinin icrasına başlayıb. Layihə iyulun 1-dən Azərbaycan Respublikasının Qeyri–Hökumət Təşkilatlarına Dövlət Dəstəyi Agentliyinin maliyyə dəstəyi ilə təşkil olunur.

Birlyin sədri layihə rəhbəri Xəlil Süleymanov açıqlamasında bildirib ki, layihənin əsas məqsədi müharibənin törətdiyi fəsadlar nəticəsində psixoloji travma almış şəhid ailələri, qazi, veteran analarına və həyat yoldaşlarına psixoloji-sosial dəstək verməkdən ibarətdir: “Təşkilatımızın apardığı sorğudan və aidiyyatı dövlət orqanlarından aldığımız məlumatlara görə Vətən Müharibəsi zamanı təmas xətti boyunca olan Beyləqan, Füzuli və Ağdam rayonlarında sosial-psxoloji dəstəyə ehtiyacı olan qadınların və qızların sayı daha çoxdur. Müharibə dəhşətlərini yaşayan, ailə üzvlərini, yaxınlarını, doğmalarını itirən, fiziki-mənəvi və psixoloji xəsarət alan qadınlar hələ də psixoloji sarsıntının təsirini yaşayırlar. Psixoloji gərginlik onların sağlamlıq vəziyyətinə ciddi təsir gösərməklə bərabər sosial durumuna da öz mənfi təsirini etməkdə davam edir”.

Xəlil Süleymanov həmçinin qeyd edib ki, psixoloji-sosial dəstəyə ehtiyacı olan qadınlarla psixoloqların təmaslarını genişləndirməklə psixoloji xidmətlər həyata keçiriləcək: “Psixoloji xidmət 30 qadına özünü psixoloji gərginlikdən azad edə bilmək vərdişi qazandıracaqdır”.

Qeyd edək ki, layihə 3 ay boyunca Füzuli, Beyləqan və Ağdam rayonlarında psixoloji-sosial dəstəyə ehtiyacı olan qadınların məlumat bazası yaratmağı, həssas qruplardan olan ailələrə səfərlər etməklə onların problemlərini müəyyənləşdirib həllinə dəstək vermək üzrə fəaliyyətləri nəzərdə tutur.