Almaniyanın Taunus dağ massivinin meşələrində arxeoloqlar Roma müharibə tanrısı Marsa həsr olunmuş, təxminən 2 min il yaşı olan məbədin qalıqlarını aşkar ediblər.

“All That’s Interesting” saytının məlumatına görə, məbəd qədim Kapersburq (Kapersburg) hərbi istehkamının yaxınlığında yerləşib. Arxeoloji tapıntılar arasında Roma qələbə ilahəsi Viktoriyanın bürünc heykəlciyi, iki nəzir daşı və ehtimal ki, Marsı təsvir edən heykəlin fraqmentləri var.

Məbəd meşə torpağının altında aşkarlanıb
Arxeoloji qazıntılar 2024-cü ildən etibarən müasir Rosbax-for-der-Höhe şəhəri yaxınlığındakı Kapersburq qalasının ətrafında yerləşən mülki yaşayış məntəqəsində — vikusta aparılır.

Qalanın özü XIX əsrdən etibarən tədqiq edilsə də, onun ətrafında formalaşmış yaşayış məntəqəsinin quruluşu uzun müddət kifayət qədər öyrənilməyib.

Kapersburq Alp dağlarından şimalda yerləşən Roma ərazilərini qoruyan Yuxarı Almaniya və Reçiya limasının müdafiə sisteminin bir hissəsi olub. Təxminən 150 il ərzində burada “Numerus Nidensium” adlı köməkçi hərbi dəstə yerləşib.

Arxeoloqlar məbədi meşə torpağının demək olar ki, dərhal altında aşkar ediblər. Təxminən 5 metr uzunluğunda düzbucaqlı tikilinin divarları olduqca möhkəm olub. İçəridə kiçik kvadrat formalı otaq yerləşib.

Otağın dördüncü divarının izinə rast gəlinməyib. Buna görə tədqiqatçılar həmin tərəfin açıq saxlanıldığını və ya taxta qapılarla bağlandığını ehtimal edirlər. Tikilinin xarici hissəsindəki möhkəm bünövrə isə məbədin ətrafında örtülü qalereyanın ola biləcəyinə işarə edir.

Arxeoloq Katarina Grisshaber Almaniyanın Hessenschau telekanalına açıqlamasında yaxşı qorunmuş Roma divarlarının tapılmasını böyük şans adlandıraraq, “Biz tamamilə heyran qaldıq”, — deyib.

Viktoriya heykəlciyi və Marsın təsviri
Məbədin yaxınlığında arxeoloqlar ehtimal ki, Marsı təsvir edən heykəlin fraqmentlərini, iki nəzir daşını və Viktoriyanın kiçik bürünc heykəlciyini tapıblar.

Heykəlciyin Viktoriya ilahəsinə aid olduğu onun xarakterik atributları ilə müəyyən edilir. Buraya qanadlar, palma budağı və qalibiyyət çələngi daxildir.

Arxeoloqların fikrincə, Kapersburq sakinləri məbədə gələrək tanrılara qurbanlar verir, onlardan qorunma və ya məsləhət istəyirdilər.

Roma dövründən sonra da yaşayış davam edib
Qazıntılar qaladakı mülki yaşayış məntəqəsinin əvvəllər düşünüldüyündən daha mürəkkəb olduğunu göstərib.

Burada sənətkarlıq fəaliyyətinin izləri, o cümlədən dəmirçilik emalatxanası aşkar edilib. Sonralar həmin ərazidə yaşayış binaları tikilib.

Roma yollarının qalıqları yaşayış məntəqəsinin planını bərpa etməyə imkan verir və burada müstəqil iqtisadi həyatın mövcud olduğunu göstərir.

Bəzi tapıntılar isə Roma hərbçilərinin III əsrin ortalarında ərazidən çəkilməsindən sonra da insanların burada yaşamağa davam etdiyini göstərir. Arxeoloqlar son antik dövrə aid keramika nümunələri və fibula aşkarlayıblar.

İlkin ehtimala görə, bu tapıntılar alemannlarla əlaqəli ola bilər. Lakin Roma qoşunlarının bölgədən çıxmasından sonra burada məhz kimin məskunlaşdığını müəyyənləşdirmək üçün əlavə araşdırmalara ehtiyac var.