Masallılı taekvondoçular “Turkish Open” beynəlxalq turnirində

Azadmedia.az-ın cənub bürosunun məlumatına görə, Azərbaycan taekvondoçuları ənənəvi “Turkish Open” beynəlxalq turnirində iştirak edəcək.

Belə ki, Türkiyənin Antaliya şəhərində keçiriləcək G2 kateqoriyalı turnirdə ölkəmizi 22 kişi və 8 qadın idmançı təmsil edəcək.

“Yeni həyat” qəzetinin əməkdaşı, Azərbaycan İdman Jurnalistləri Assosiasiyasının üzvü Akif Ağayev xəbər verir ki, kişilərdən ibarət milli komandanın heyətində Masallıdan olan taekvondoçular – Rahid Vəliyev (54 kq) və Samir Məhərrəmov (68 kq) də yer alıb.

49 ölkədən 1250 taekvondoçunun qatıldığı turnirdə, fevralın 12-də qadınlar, 13-də isə kişilər mübarizəyə qoşulacaq.

Mövsümün ilk yarışında Azərbayan yığma komandasının hər bir üzvünə uğurlar arzulayırıq.

Qeyd edək ki, taekvondo üzrə idman ustası Rahid Vəliyev Avropa çempionatının gümüş medalçısı, beynəlxalq turnirlərin mükafatçısı, Samir Məhərrəmov isə dördqat Azərbaycan çempionu, beynəlxalq turnirlərin mükafatçısıdır. Hər iki taekvondoçu Masallı Rayon Gənclər və İdman İdarəsi nəzdində fəaliyyət göstərən Uşaq-Gənclər İdman Məktəbinin məşqçi-müəllimi Sadiq Ağayevin yetirməsidir.

Ülkər Piriyeva