Dövlət Statistika Komitəsinin məlumatına görə, 2022-ci ildə Azərbaycanda 28 min 435 nəfərə suçiçəyi diaqnozu qoyulub. Bundan öncə suçiçəyinə ən yüksək yoluxma sayı 2018-ci ildə qeydə alınmışdı – 15 min 870 yoluxma. Bu baxımdan aydın olur ki, 2022-ci ildə Azərbaycanda qeydə alınan suçiçəyi hallarının sayı indiyədək qeydə alınan ən yüksək göstərici ilə müqayisədə 79 faiz yüksək olub.

2022-ci ildə yoluxma hallarında kəskin artım qeydə alınan digər bir xəstəlik qoturluqdur. İl ərzində ölkədə 1535 nəfərə qoturluq diaqnozu qoyulub. Bu, son 20 ildə qeydə alınan ən yüksək göstəricidir.

2022-ci ildə pedikulyoz (bitlənmə) hallarının sayında da əvvəlki dövrlə müqayisədə artım olub. Ötən il 208 nəfərə pedikulyoz diaqnozu qoyulub. Bu, 2010-cu ildən bəri ölkədə qeydə alınan ən yüksək göstəricidir. (Azadlıq radiosu)