Paytaxtın Yasamal rayonunda 2 küçədə istismar müddəti başa çatan qaz xətlərinin yenilənməsi işləri həyata keçirilir. K.Kazımzadə küçəsində vaxtı ilə müxtəlif diametrli polad boru ilə çəkilmiş qaz xətti diametri 250 mm olan polietilen boru ilə əvəzlənir. 480 metr uzunluğunda çəkilən yeni qaz xətti hazır olduqdan sonra 2 min əhali abonentinin, 250-dək qeyri-əhali istehlakçısının qaz təchizatı normal şəkildə tənzimlənəcək.
Azəriqaz İB-dən Azadmedia.az-a verilən məlumata görə 20 min abonentin təbii qaza olan tələbatını fasiləsiz və təhlükəsiz şəkildə təmin etmək məqsədi ilə Yasamal rayonunun M.Həmidov küçəsində də təmir işləri həyata keçirilir. İstismar müddəti başa çatmış diametri 273 mm olan polad boru ilə çəkilmiş qaz xətti uzunluğu 400 metr, diametri 400 mm olan polietilen boru ilə əvəzlənir. Hər iki küçədə qaz xətlərinin yenilənməsi işlərini “Azəriqaz” İstehsalat Birliyinin təmir-tikinti idarəsi icra edir.