Büdcə Məcəlləsinin hazırlanması üzərində iş gedir.

Azadmedia.az xəbər verir ki, bunu maliyyə naziri Samir Şərifov Milli Məclisin İqtisadi siyasət, sənaye və sahibkarlıq komitəsinin bugünkü iclasında "Büdcə sistemi haqqında" və "Dövlət borcu haqqında" qanunlara təklif edilən dəyişikliklərin müzakirəsi zamanı deyib.

S.Şərifov bildirib ki, millət vəkillərinin də tövsiyələrinə uyğun olaraq Büdcə Məcəlləsi hazırlanır və bu, müəyyən vaxt aparacaq.

"Hazırda isə Vətən müharibəsində qazanılan Zəfərin yaratdığı reallıqlar və müasir dövrün çağırışları kontekstində, o cümlədən mövcud qanunvericiliyə uyğun təklif olunan bu dəyişikliklərin qəbulu aktualdır", - deyə nazir qeyd edib.

2020-ci ildə pandemiya ilə əlaqədar qanunla icrası 2022-ci ilə qədər dayandırılan büdcə qaydasının tətbiqinin bərpası nəzərdə tutulur. Büdcə qaydasının yeni təkmilləşdirilmiş variantı təklif olunub.

Naziri qeyd edib ki, "Büdcə sistemi haqqında" qanunda olan anlayışlara, deputatlar, o cümlədən Hesablama Palatası tərəfindən qaldırılan bir sıra məsələlərə də yenidən baxılıb, sənəd yeni redaktədə dəqiqləşdirilib.

O qeyd edib ki, "Büdcə sistemi haqqında" qanunda edilən dəyişikliklərə uyğun olaraq "Dövlət borcu haqqında" qanuna da dəyişikliklər təklif olunurş Burada əsasən dövlət borcu və zəmanəti üzrə öhdəliklərin Təminat Fondu ilə bağlı məsələlər öz əksini tapıb.