Fransa Azərbaycan Respublikasındakı diplomatik nümayəndəliyinin rəhbərini məsləhətləşmələr üçün geri çağırmışdır və yayılan məlumata əsasən diplomat Prezident Makron tərəfindən qəbul edilmişdir. Beynəlxalq münasibətlərdə və diplomatik təcrübədə rast qəlinən belə bir addımla bağlı bir sıra şərhlərə ciddi ehtiyac var.

İkitərəfli münasibətlərdə Fransanın uzun müddət ərzində sərqilədiyi destruktiv fəaliyyət faktiki olaraq hazırda pik həddə çatmışdır.

25 ilə yaxın bir müddətdə ATƏT-in Minsk Qrupu çərçivəsində guya vasitəçilik missiyası ilə məşğul olan dövlət 14 mart 2008-ci ildə BMT-nin Baş Assambleyası tərəfindən “Azərbaycanın işğal edilmiş ərazilərində vəziyyət” adlanan qətnamənin qəbul edilməsinin əleyhinə səs verir.

Halbuki müzakirəyə təqdim olunan sənəddə Azərbaycan Respublikasının beynəlxalq sərhədləri çərçivəsində suverenliyinin və ərazi bütövlüyünün dəstəklənməsi və bir sıra digər mühüm məsələlər öz əksini tapmışdır. Fransa Parlamentinin hər iki palatası - Senat və Milli Assambleya ölkəmizə qarşı vahid cəbhədən çıxış edərək, hamılıqla qəbul edilən beynəlxalq hüquq prinsiplərlərinə dəfələrlə hörmətsizlik nümayiş etdirib aşkar formada təcavüzkar Ermənistanı dəstəkləmiş və Azərbaycanın ərazi bütövlüyünü və suverenliyini sual altına alan qətnamələr qəbul etmişdir. Fransa BMT-nin Təhlükəsizlik Şurası, Avropa İttifaqının Parlamenti və digər beynəlxalq platformalarda Azərbaycana qarşı müxtəlif sənədlərin qəbul edilməsi üçün xüsusi fəallıq nümayiş etdirib.

Cənubi Qafqaz regionunda beynəlxalq sülhün və təhlükəsizlik rejimin bərqərar olunmasına heç bir maraq göstərməyən Fransa surətlə Ermənistanı silahlandırır və yenidən bu bölgəni münaqişə zonasına çevirmək üçün müxtəlif addımlar atır. Əlbəttə ki belə, cəhdlərin qarşısı dövlətimiz tərəfindən qətiyyətlə alınacaq və istər iqtisadi, istərsə də hərbi cəhətdən regionun ən qüdrətli ölkəsi olaraq Azərbaycan gündəlikdə duran bütün problemləri ən səmərəli formada həll edəcək.

Təşəkkür edirəm.