Hindistanın Qoa şəhərində saxlanılan 58 yaşlı rusiyalı olimpiya mükafatçısı Svetlana Varqanova zaminə buraxılıb. Azadmedia.az xəbər verir ki, bu barədə TASS və RİA Novosti-yə Rusiya Federasiyasının Mumbaydakı Baş Konsulluğundan məlumat verilib. Xanım Varqanova narkotik vasitələrin qanunsuz dövriyyəsi ittihamı ilə saxlanılıb, diplomatik nümayəndəliyin nümayəndəsinin sözlərinə görə, o, indi dəqiq harada olduğunu açıqlamamağa üstünlük verir.
“Varqanova Mapusa şəhər məhkəməsi tərəfindən zaminə buraxılıb, bu, aprelin 28-də baş verib. Onunla bağlı proses davam edir”, - Baş Konsulluğun nümayəndəsi bildirib. Onun sözlərinə görə, keçmiş idmançı Qoadadır, o, hələlik Rusiyanın rəsmi orqanları ilə əlaqə saxlamaq niyyətində deyil.

Svetlana Varqanova 1980-ci il Olimpiadasında 200 m məsafəyə brass üsulu ilə üzmədə gümüş, 1982-ci ildə bu növdə dünya çempionu, 4x100 m qarışıq estafetdə isə bürünc medal qazanıb.

Indian Express qəzeti yazıb ki, xanım Varqanova bir neçə il Hindistanda yaşayıb və orada əcnəbilərə narkotik satıb. Qəzet yazır ki, narkotik satıcılarının tutulması əməliyyatı təxminən iki həftə davam edib. Onun sözlərinə görə, saxlanılanlar beynəlxalq narkotik kartelinin üzvü olub, əsas şəxs Rusiya vətəndaşı olub.