Bakı bir ay ərzində şahmatın dünya paytaxtı olacaq. Azadmedia.az xəbər verir ki, bunu Bakıda Beynəlxalq Şahmat Federasiyasının (FIDE) prezidenti Arkadi Dvorkoviç deyib.

Cümə günü, mayın 5-də Azərbaycanın paytaxtında ümummilli lider Heydər Əliyevin 100 illik yubileyinə həsr olunmuş “Baku Open” şahmat festivalının açılış mərasimi olub. Tədbirdə FİDE-nin prezidenti Arkadi Dvorkoviç, Azərbaycan Şahmat Federasiyasının rəhbəri Mahir Məmmədov, gənclər və idman naziri Fərid Qayıbov iştirak ediblər. Festival “Baku Crystal Hall”da keçirilir və onun mükafat fondu 55 000 ABŞ dolları (93 500 manat) təşkil edir. Festivalda 23 ölkədən altı yüzdən çox şahmatçı mübarizə aparır.

Turnirin açılış mərasimindən sonra iyulun 29-dan avqustun 25-dək Azərbaycan paytaxtında keçiriləcək şahmat üzrə Dünya Kubokunun keçirilməsi ilə bağlı müqavilə imzalanıb. Bu mərasimdə FİDE-nin rəhbəri Arkadi Dvorkoviç milli federasiyaya dünya çempionatının rusiyalı Yan Nepomniaxçi ilə çinli Dinq Liren arasında keçirilən 13-cü oyununda istifadə edilmiş şahmat taxtasını təqdim edib.

Dünya çempionu adı uğrunda qarşılaşmanın 14 oyununun hər birində şahmat taxtaları dəyişdirilib və Nepomniaxtçi və Liren onların hər birinə öz avtoqraflarını qoyublar. Xatırladaq ki, Dinq Liren 14 oyunda heç-heçə (7:7), tay-brekdə 2,5:1,5 hesabı ilə qələbə qazanaraq dünya çempionu olub.
FİDE rəhbəri jurnalistlərə müsahibəsində dünya kubokunun şahmat üzrə ən mühüm yarışlardan biri olduğunu vurğulayıb.

"Dünya çempionatı matçından sonra Dünya Kuboku təqvimimizdə ən vacib ikinci yerdir. Onun iştirakçıları çətin seçimdən keçirlər və Dünya Kubokunun qalibləri dünya tacına növbəti namizədin çıxacağı Namizədlər Turnirinə vəsiqə qazanmaq imkanı əldə edirlər. əzmlidir. Biz Azərbaycan rəhbərliyinə və federasiyaya Dünya Kubokunun keçirilməsinə dəstək verdiyinə görə minnətdarıq. Bakı bir ay ərzində şahmatın əsl dünya paytaxtına çevriləcək”, - Dvorkoviç bildirib.

Öz növbəsində Azərbaycan Şahmat Federasiyasının prezidenti Mahir Məmmədov ölkəmizdə şahmatın inkişafı üçün Baku Open və Dünya Kuboku kimi turnirlərin keçirilməsinin vacibliyini vurğuladı və belə bir əlamətdar yarışın keçirilməsinə imkan yaratdığına görə FİDE rəhbərinə təşəkkür etdi.