Ali təhsil və orta ixtisas təhsil müəssisələrində auditoriyalara məhdudiyyət qoyulacaq.

Auditoriyanın 70 faizindən istifadəyə icazə veriləcək.

Bu barədə Təhsil Nazirliyinin Elm, ali və orta ixtisas təhsili şöbəsinin müdiri Nicat Məmmədli məlumat verib.

Onun sözlərinə görə, tələbə sayı auditoriyadakı yerlərin 70 faizindən çoxdursa, tədris alternativ qaydalarda təşkil ediləcək:

"Qruplar növbəli şəkildə tədrisə cəlb oluna bilər və ya zərurət yarandıqda distant formada tədris təşkil oluna bilər. Əgər distant təhsildən söhbət gedirsə, burada müəllimlərin dərs saatında ciddi dəyişiklik olmayacaq, çünki həmin qrupun eyni vaxtda cəmlənməsi nəzərdə tutulur. Əgər növbəli şəkildə tədrisin təşkilindən söhbət gedirsə, bu halda, müəllimlərin dərs yükü arta bilər və bu da təhsil müəssisələrinin özləri tərəfindən tənzimlənəcək”.

Yenisabah.az