İbrahim Cəfərov,
Professor, ADAU-nun rektoru

Bu gün zəhmətkeşlərin peşə bayramı günüdür. Prezident cənab İlham Əliyevin 2008-ci ildə imzaladığı Fərman əsasında hər il noyabrın 1-i Azərbaycanda Kənd Təsərrüfatı İşçiləri Günü kimi qeyd olunur.

Azərbaycan böyük əkinçilik ənənələrinə malik ölkələrdən biridir. Ümummilli lider Heydər Əliyevin siyasi iradəsi və gərgin əməyi ilə istər keçmiş sovetlər dönəmində, istərsə də müstəqil Azərbaycana rəhbərlik etdiyi dövrdə bütün sahələrdə olduğu kimi aqrar sahədə də ciddi islahatlar aparılıb, resurslardan səmərəli və məqsədyönlü istifadə təmin olunub, sahənin dayanıqlı inkişafı üçün möhkəm baza yaradılıb. Əsası ümummilli lider tərəfindən qoyulmuş və hazırda davam etdirilən uğurlu aqrar siyasət nəticəsində ölkə iqtisadiyyatında kənd təsərrüfatı xüsusi yerə sahib olub.
Hazırda ölkəmizdə iqtisadiyyatın digər sahələri kimi aqrar sahə də keyfiyyətcə yeni inkişaf mərhələsinə qədəm qoyub. Aqrar sahə qeyri-neft sektorunun ən aparıcı sahəsi elan edilib. Kənd təsərrüfatının strateji əhəmiyyətli və iqtisadi cəhətdən səmərəli istehsal sahələrinin inkişaf etdirilməsi prioritet vəzifələrdən biri kimi müəyyən edilib. Həyata keçirilən aqrar islahatlar kənd təsərrüfatının daha da inkişafını nəzərdə tutur və bu məqsədlə dövlət tərəfindən çox böyük dəstək tədbirləri həyata keçirilir. Fermerlərin texnika, gübrə və damazlıq heyvanla təminatı ilə bağlı dövlət tərəfindən güzəştlər tətbiq edilir. Qəbul olunan qərarlar, imzalanmış Fərman və Sərəncamlar ölkə iqtisadiyyatının, o cümlədən aqrar sektorun davamlı inkişafına real zəmin yaradır. Aqrar sahədə inkişaf ölkədə kənd təsərrüfatı məhsullarının ixracına da əhəmiyyətli təsir göstərib. Aqrar sahənin ixrac potensialı yüksəlib, kənd təsərrüfatı məhsullarının ölkənin valyuta gəlirlərinin formalaşmasında rolu artıb. Bu nəticələrə dövlətin yürütdüyü uğurlu aqrar siyasət və fermerlərə göstərilən xüsusi diqqət sayəsində nail olunub.
Bu gün aqrar sahədə əldə edilən uğurlar və yüksək nəticələr cənab İlham Əliyev tərəfindən çox yüksək qiymətləndirilir. İki gün öncə dövlət başçısının kənd təsərrüfatı sektorunda çalışanları fəxri ad, orden və medallarla təltif etməsi onlara göstərdiyi yüksək diqqət və qayğının təzahürüdür.
Son illər ərzində Kənd Təsərrüfatı Nazirliyinin əməkdaşları səmərəli fəaliyyət göstərib, ciddi nəticələr əldə edib. Kənd Təsərrüfatı Nazirliyi çox ciddi uğurlara imza atıb. Bu, dövlət rəhbərliyi tərəfindən yüksək qiymətləndirilir. Bir qayda olaraq Kənd Təsərrüfatı Nazirliyinin bütün təşəbbüsləri hər zaman dəstəklənib. Bu təşəbbüslər Nazirliyin potensialının gücləndirilməsinə xidmət edir. Bu illər ərzində Kənd Təsərrüfatı Nazirliyinin gücləndirilməsi istiqamətində işlər görülüb və fəaliyyət üçün konkret prinsplər müəyyənləşdirilib. Hesab edirəm ki, qarşıdakı dövr ərzində daha ciddi nəticələr əldə olunacaq.
Aqrar sahədə inkişaf ölkədə kənd təsərrüfatı məhsullarının ixracına da əhəmiyyətli təsir göstərib, aqrar sahənin ixrac potensialı yüksəlib.
Cənab İlham Əliyevin imzaladığı son fərman və sərəncamlar, eyni zamanda aqrar sahəyə göstərdiyi daimi diqqət və qayğı nəticəsində kənd təsərrüfatının bütün sahələri dinamik inkişaf edib, köklü dəyişikliklər baş verib və zəruri potensialın formalaşdırılması üçün məqsədyönlü tədbirlərin icrası uğurla davam etdirilir.
Rəhbərlik etdiyim Azərbaycan Dövlət Aqrar Universiteti də peşəkar mütəxəssislər hazırlamaqla aqrar sahənin inkişafına öz töhfəsini verir. Son illər tələbələrimiz Türkiyə və Rusiya ali təhsil ocaqları ilə təcrübə mübadiləsi aparır, bu da tələbələrin marağına və daha da təkmilləşməsinə səbəb olur. Cənab Prezident aqrar sahəni həmişə diqqətdə saxladığı kimi, biz də Kənd Təsərrüfatı Nazirliyi ilə birlikdə çalışacağıq ki, dövlətimizin iqtisadiyyanının əsas sütunlarından olan aqrar sahədə daha yüksək nailiyyətlərə imza ataq.