Azərbaycan Respublikası Konstitusiyasının 109-cu maddəsinin 32-ci bəndinə əsasən, Azərbaycan xalqının Ümummilli lideri Heydər Əliyevin 100 illik yubileyinin dövlət səviyyəsində qeyd olunmasını təmin etmək məqsədilə Azərbaycan Respublikasında 2023-cü il “Heydər Əliyev ili” elan edilib.
Bu münasibətlə 274 nömrəli tam orta məktəbdə ulu öndər Heydər Əliyevin əziz xatirəsinə həsr olunmuş tədbir keçirilib.
Məktəbin Azərbaycan dili və ədəbiyyat müəllimi Yeganə Əliyevanın və Mədəniyyət evinin bədii rəhbəri Mətanət Cəfərovanın təşkli etdikləri tədbirdə məktəbin direktoru Nəriman Mürsəliyev, direktor müavinləri Fəxrəddin Hüseynov, Südabə Mədətova, Vəfa Quliyeva, Aygün Zeynalova, psixoloqlar, müəllimlər və şagirdlər iştirak edib.
Tədbir Azərbaycan Respublikasının Dövlət himninin səsləndirilməsi ilə başlanıb.
Xalqımızın böyük oğlu, müasir Azərbaycan dövlətinin banisi və qurucusu ulu öndər Heydər Əliyevin həyat yolundan, Vətən qarşısında tarixi xidmətlərindən danışan məktəbimizin direktoru Nəriman Mürsəliyev ulu öndərin mənalı ömür yolunun hər anının, hər səhifəsinin bugünkü və gələcək nəsillərə nümunə olacaq canlı və unudulmaz bir tarix olduğunu xüsusi qeyd edib.
Şagirdlərin ifasında səslənən şeirlər, ifa olunan musiqilər tədbir iştirakçıları tərəfindən alqışlarla qarşılanıb.
Tədbirdə Ümummilli lider Heydər Əliyevin həyat yoluna həsr olunmuş videoçarx nümayiş olunub.