Avqustun 18-də Marketinq Fəaliyyətinin Inkişafına Dəstək İctimai Birliyi “Quba-Xaçmaz iqtisadi rayonunda tənha qadınlara özünüməşğulluq fəaliyyətinin təşviqi” layihəsini Quba rayon Gənclər Mərkəzində icra edibdir.
Layihənin icrasında Azərbaycan Dövlət Pedaqoji Universitetinin Quba filialının əməkdaşı, Azərbaycan Jurnalistlər Birliyinin üzvü Nəhayət Şirinova və Regional İnkişaf İctimai Birliyinin Quba–Xaçmaz regionu üzrə nümayəndəsi Fatimə Bədirxanlı iştirak ediblər.

Layihə rəhbəri Sənan Yəhya Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Qusar rayonunda icra edilən layihənin məqsədi haqqında geniş məlumat verib: "Bu gün Azərbaycan cəmiyyəti qlobal mədəniyyətin ayrılmaz hissəsidir. Bu təsirlər bir çox hallarda daha çox mənfi təsirlərlə yadda qalır. Xüsusilə ailə institutunun qorunması, bu mədəniyyəti digər nəsillərə daşımaq istiqamətində gənclər üçün nümunə olası uğur hekayələrinin sayı hər gün azalmaqdadır. Bunun əvəzində qadınlara qarşı şiddət və nigahların pozulmasına dair xəbərlərin sayı artmaqdadır. Bu arzu olunmaz hadisələrin qarşısının alınması üçün cəmiyyətdə qadınların davamlı inkişafı zərurət təşkil edir. Davamlı inkişafını təmin etmək istəyən qadınların həyata keçirilən belə layihələrə qatılması bir fürsətdir”.

Azərbaycan Dövlət Pedaqoji Universitetinin Quba filialının əməkdaşı, Azərbaycan Jurnalistlər Birliyinin üzvü Nəhayət Şirinova Quba şəhərində keçirilən belə layihələr statusundan asılı olmayaraq bütün qadınlar üçün faydalı olduğunu vurğulayıb: “Cəmiyyətimizdə qadınların təhsil alması üçün bərabər imkanlar yaradılıb. Lakin bütün təhsilli və ya təhsilsiz qadınlar iqtisadi azadlıqlarını təmin edə bilmirlər. Buna səbəb onların bilik və bacarıqlarının azlığı, onların kommunikasiya, özünə güvənsizlik problemləridir. Düşünürəm ki, belə layihələrin davamlı olması regionda qadınların kommunikasiya, özünəgüvən problemlərinin aradan qaldırılmasına və şəxsi biznes təşəbbüslərinin formalaşmasına müsbət təsir edəcək”.

Regional İnkişaf İctimai Birliyinin Quba–Xaçmaz regionu üzrə nümayəndəsi Fatimə Bədirxanlı bildirib ki, qadınların ictimai təşkilatlarda aktiv fəaliyyəti onlar üçün yeni imkanlar formalaşdırır: “Bu imkanlar onların məşğulluq problemlərinin həllində birbaşa, bəzən isə dolayısı ilə iqtisadi azadlıqlarının təmin olunması istiqamədinrə dəyərli biliklər qazandırır. Hər bir qadın öz uğur hekayəsini yarada bilər. Kimdən asılı olmaq, kiminsə himayəsində olmaq kimi düşüncələri alın yazısı kimi qəbul etmək haqqı yoxdur. Qadınlarımız ailə qurmalı, ailə dəyərlərinə sahib çıxmalı, ailə büdcəsinin idarə olunması və ona əlavə dəyər qatmanı özləri təmin etməlidirlər. Qeyd etdiklərimə nail olmaq üçün qadınların bilik və bacarıq qazanması onların belə layihələrdə aktiv olmasından və özünə güvəndən başlayır. Hər bir qadının xoşbəxt yaşaması, iqtisadi azadlıqlara sahib olması onların haqqıdır”.