Yanvar ayının 28-dən fevralın 1-nə qədər Çinin Pekin şəhərində bir çox dünya nəşriyyatlarının nümayəndələrinin iştirak etdiyi görüş keçirilmişdir. Görüş çərçivəsində “Si Cinpin dövlətin idarə olunması haqqında” kitabının 4-cü cildinin nəşr edilməsi memorandumunun imzalanması törəni də reallaşdırılmışdır.
İyirmidən artıq ölkədən gəlmiş naşirlərin qatıldığı bu mötəbər tədbirdə Azərbaycanı “Şərq-Qərb” ASC-nin Nəşriyyat departamentinin direktoru Sevil İsmayılova təmsil etmişdir. Xatırladaq ki, qeyd edilən kitabın üç cildi Azərbaycan dilində artıq nəşrə hazırlanmışdır.
Memorandumun imzalanması mərasimindən əvvəl keçirilən görüşdə tədbirin moderatoru, Çin Xalq Respublikasının Xarici dillərdə Ədəbiyyatların Nəşri və Yayılması İdarəsinin müdiri Du Çjanyuan çıxış edərək Çin nəşriyyatları ilə dünya nəşriyyatları arasında əməkdaşlığın möhkəmləndirilməsinin əhəmiyyəti haqqında danışmışdır. Daha sonra Çin Kommunist Partiyasının Mərkəzi Komitəsinin Təbliğat şöbəsinin rəhbəri Li Şuley “Si Cinpin dövlətin idarə edilməsi haqqında” kitabının dünya dillərində nəşrinin və təbliğinin Çin üçün necə böyük əhəmiyyət daşıdığını vurğulamışdır.
Memorandumun təntənəli imzalanma mərasimində “Şərq-Qərb” ASC-nin Nəşriyyat departamentinin direktoru Sevil İsmayılova Çinin Xarici dillərdə Nəşrlər nəşriyyatının direktoru Xu Kayminlə əməkdaşlıq haqqında sənədə imza atmışdır.
Daha sonra bütün nəşriyyat nümayəndələrinə nəşrin çin dilində dördüncü cildi təqdim edilmiş və xatirə şəkli çəkdirilmişdir.
Onu da qeyd edək ki, kitab 180 olkədə 40 dildə nəşr ediləcəkdir.
Bu günlərdə Nəşriyyatın ünvanına iştirak və uğurlu əməkdaşlıq üçün təşəkkür məktubu göndərilmişdir.